ՌԴ փոխարտգործնախարարն ու ԿԽՄԿ ներկայացուցիչը քննարկել են ԼՂ հակամարտության հումանիտար հետևանքների հաղթահարումը
Դեկտեմբերի 15-ին հանդիպում է կայացել Ռուսաստանի Դաշնության փոխարտգործնախարար Սերգեյ Վերշինինի և Կարմիր խաչի միջազգային կոմիտեի՝ ճգնաժամային իրավիճակներում օպերատիվ գործողությունների ծրագրի ղեկավար Պասկալ Հունդի հետ: Այս մասին տեղեկացնում է ՌԴ ԱԳՆ մամուլի ծառայությունը:
«Մանրամասնորեն քննարկվել է Ռուսաստանի և ԿԽՄԿ փոխգործակցությունը՝ շեշտադրում անելով Լեռնային Ղարաբաղի հակամարտության հումանիտար հետևանքների հաղթահարմանը»,- ասվում է արտաքին քաղաքականության գերատեսչության հաղորդագրության մեջ:
Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։
Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա:










