Սիրիական և ռուսական օդուժերը Լաթաքիայում ավիահարվածներ են հասցրել օտարերկրյա ծայրահեղական խմբավորումներին. կա ավելի քան 25 զոհ
Կիրակի օրը Սիրիայի և Ռուսաստանի ռազմաօդային ուժերը Լաթաքիայի արվարձանում մեծ հարձակում են գործել ծայրահեղական խմբավորումների վրա՝ մեծ կորուստներ պատճառելով նրանց, հայտնում է almasdarnews.com լրատվական կայքը:
Տեղեկությունների համաձայն, Ռուսաստանի և Սիրիայի ռազմաօդային ուժերը թիրախավորել են «Թուրքեստանի իսլամական կուսակցության» դիրքերը: Ծայրահեղական խմբավորումը ներկայումս բաղկացած է Սիրիայի ներսում կռվող մեծ թվով օտարերկրացիներից:
Ռուսական և սիրիական ռազմական ինքնաթիռները նպատակադրված թիրախավորել են «Թուրքեստանի իսլամական կուսակցության»՝ Լաթաքիայի ժաբալ Ալ-Աքրադ շրջանում գտնվող դիրքերը, որտեղ՝ Քաբանի և Իդլիբ նահանգների միջև ծայրահեղականները մեծ ազդեցություն ունեն:
Հարվածներին նախորդել են ռուսական օդուժի հետախուզական թռիչքները:
Ըստ տեղական որոշ աղբյուրների, ռուսական և սիրիական ավիահարվածները ոչնչացրել են ավելի քան 25 օտարերկրյա ծայրահեղական, որոնց մեծ մասը «Թուրքեստանի իսլամական կուսակցության» և «Հայաթ Թահրիր Ալ-Շամ» խմբավորումների անդամ է:
Վերոնշյալ զինյալ խմբավորումներին անդամակցում են ծայրահեղականներ ամբողջ աշխարհից՝ ներառյալ Կովկասից և Արևմտյան Չինաստանից:










