Առուշ Առուշանյանի փաստաբանները առևանգման դեպքի առթիվ ոստիկանություն հաղորդում են ներկայացրել, չի բացառվում, որ այս պահին վտանգ է սպառնում նրա կյանքին. Գորիսի փոխքաղաքապետ

14:08 • 21.12.20

Գորիս համայնքի ղեկավարի առևանգման դեպքի առթիվ Առուշանյանի փաստաբանները ոստիկանություն հաղորդում են ներկայացրել։ Այս մասին ֆեյսբուքյան իր էջում գրել Գորիսի փոխքաղաքապետ Իրինա Յոլյանը:

«Այս պահին չի բացառվում, որ վտանգ է սպառնում նաև Առուշ Առուշանյանի կյանքին։

Հիշեցնեմ, որ վաղ առավոտից համայնքի ղեկավարին առևանգել են և մինչ այս պահը  չի հաջողվում որևէ տեղեկատվություն ստանալ։ Այս մասին տեղեկացվել է նաև մարդու իրավունքների պաշտպանը։

Նաև նշեմ, որ դեռևս Սիսիանից Գորիս մտնող ճանապարհը փակ է, Գորիսում են նաև մարզի համայնքերի ղեկավարներ, բազմաթիվ քաղաքացիներ»,- գրել է Յոլյանը:

Հիշեցնենք, որ սյունեցիները վաղ առավոտից փակել էին Սյունիքի դարպասները՝ Նիկոլ Փաշինյանի մուտքը բացառելու նպատակով: Ավելի վաղ բերման էր ենթարկվել Գորիսի քաղաքապետ Առուշ Առուշանյանը:

Նշենք նաև, որ Նիկոլ Փաշինյանը այցելեց Սիսիան, որից հետո ֆեյսբուքյան իր էջում գրառում կատարել՝ հայտնելով, որ ընդհատում է այցը և վերադառնում Երևան: