«Սաակաշվիլիի կառավարությունը վտանգավոր որոշումներ է կայացրել, որոնք հանգեցրել են մեր տարածքների փոխանցմանն այլ պետությանը». Վրաստանի ՊՆ-ն` Ադրբեջանի հետ վիճելի վանական համալիրի մասին
Վրաստանի պաշտպանության նախարարի պաշտոնակատար Իրակլի Ղարիբաշվիլին երկրի խորհրդարանի կոմիտեների համատեղ նիստի ժամանակ անդրադարձել է վրաց-ադրբեջանական սահմանին գտնվող Դավիթ Գարեջի վանական համալիրի հարցին, որը վերջին տարիներին սահմանային վեճերի առիթ է դառնում Վրաստանի և Ադրբեջանի միջև: Այս մասին գրում է kvira.ge կայքը:
Ղարիբաշվիլին իր ելությում նշել է, որ 1938 թվականի քարտեզի համաձայն՝ վանական համալիրի ամբողջ տարածքը պատկանում է Վրաստանին:
Նրա խոսքերով` երկրի երրորդ նախագահ Միխեիլ Սաակաշվիլիի կառավարությունը Դավիթ Գարեջի վանական համալիրի վերաբերյալ շատ վտանգավոր որոշումներ է կայացրել:
«1996 թվականին նախագահներ Ալիևի և Շևարնաձեի միջև Դավիթ Գարեջիի վերաբերյալ պայմանավորվածություն էր ձեռք բերվել: Պայմանավորվածությունը ենթադրում էր, որ սահմանային խնդիրների կարգավորման միակ կարևոր փաստաթուղթը 1938 թվականի համաձայնագիրն է և կողմերը համաձայնել էին առաջնորդվել միայն այդ փաստաթղթով:
Ցավոք, դա պարզվել է միայն տարիներ անց, և հատկապես մտահոգիչ է, որ Սաակաշվիլիի կառավարությունը շատ վտանգավոր որոշումներ է ընդունել, և դա այն է, ինչը այժմ պետք է պարզվի դատախազության կողմից: Նրանց որոշումների բովանդակությունը բերել է մեր տարածքների կորստին և դրանց փոխանցմանը այլ պետությանը, այդ թվում` Դավիթ Գարեջիի մի մասի փոխանցմանը:
Վերը հիշատակված քարտեզի տվյալներով՝ Գարեջիի բոլոր վիճելի հատվածները ամբողջությամբ մեզ են պատկանում: Մենք այս հարցը սկսել ենք ուսումնասիրել իմ պաշտոնավարման ընթացքում, քանի որ դա իմ ուղիղ պարտականությունն էր, և մենք հայտնաբերել ենք, որ բոլոր այդ փաստաթղթերն ու քարտեզները անհետացել էին Վրաստանի արխիվներից: Պարզվել է նաև, որ նախորդ կառավարությունն ու հանձնաժողովը երբեք չեն փնտրել 1938 թվականի քարտեզը, որով կարող էին կարգավորվել վիճելի տարածքների հարցերը: Ավելին` նախորդ կառավարության հանձնաժողովը առաջնորդվել է այլ քարտեզներով, որոնցում արտահայտվում էր մեր պետության դեմ դիրքորոշում, ինչի արդյունքում ստորագրվել է հակապետական համաձայնություն:
Քարտեզի համաձայն, Վրաստանի և Ադրբեջանի սահմանը անցնում է Գարեջի վանական համալիրի բլրի երկայնքով, մոտ 500 մետր խորության վրա: Նախկին կառավարությունը Չիչխիթուրի վանքի մոտ սահմանը հատելու փոխարեն, այն կառուցվել է անմիջապես բլրի գագաթին, այլ ոչ թե դրա ստորոտում»,-նշել է Իրակլի Ղարիբաշվիլին:
Պատմականորեն վրացական Դավիթ Գարեջի վանական համալիրը վերջին տարիներին սահմանային վեճերի պատճառ է դարձել Վրաստանի և Ադրբեջանի միջև: Ներկայումս վանական համալիրի մի մասը գտնվում է Վրաստանի, մյուս մասը` Ադրբեջանի վերահսկողության տակ:










