Արցախի նախագահի կողմից առաջարկ եմ ստացել գործադիր իշխանությունում այլ պաշտոն զբաղեցնելու. Արտակ Բեգլարյան (տեսանյութ)

11:12 • 23.12.20

 

Արցախի Հանրապետության նախագահի կողմից առաջարկ եմ ստացել գործադիր իշխանությունում այլ պաշտոն զբաղեցնելու։ Այս մասին լրագրողների հետ հանդիպմանը հայտարարեց ԱՀ ՄԻՊ Արտակ Բեգլարյանը։

Հիշեցնենք, որ վերջինս երեկ հրաժարական է տվել Արցախի ՄԻՊ-ի պաշտոնից:

«Սրա մասին երկար եմ մտածել, դժվար որոշում է եղել, բայց հաշվի առնելով այն աշխատանքը, որը պետք է կատարեմ, ու կարիքը գործադիր իշխանությունում աշխատելու, որոշում եմ կայացրել»,-ասաց նա՝ չհստակեցնելով սակայն, թե գործադիր իշխանությունում ինչ աշխատանք է կատարելու, մինչև նախագահը կհրապարակի որոշումը։

«Ես այնտեղ առաջին հերթին կարճաժամկետ ճգնաժամային կառավարման հարցերով եմ զբաղվելու այնքանով, որքանով իմ կարողություններն ու լիազորությունները թույլ տան, որից հետո միջնաժամկետ ու երկարաժամկետ հատվածների համար պետք է պլանավորենք և իրականացնենք բարեփոխումներ՝ նախագահի ծրագրին, հայտարարած կուրսին համապատասխան։ Ես առավելագույնս պատրաստ եմ նախագահի գլխավորությամբ այդ բարեփոխումների աշխատանքներին լծվելու»,-ասաց Բեգլարյանը։

Նա ընդգծեց՝ իրեն ոչ մի բան չի խանգարելու  գործադիր իշխանությունում ևս պատշաճ ուշադրություն դարձնելու մարդու իրավունքների պաշտպանությանը։ «Թեև լքում եմ ՄԻՊ-ի պաշտոնը, բայց մարդու իրավունքների պաշտպանության դիրքերը չեմ լքում»,-նշեց նա։

Նրա խոսքով՝ ՄԻՊ-ի՝ պատերազմի վերաբերյալ փաստահավաք գործունեությունը, ընդհանուր առմամբ, ավարտված է։