Լավրովն ու Այվազյանը քննարկել են ԼՂ հարցով եռակողմ հայտարարության իրագործումը
Դեկտեմբերի 23-ին հեռախոսազրույց է կայացել Ռուսաստանի ԱԳ նախարար Սերգեյ Լավրովի և ՀՀ ԱԳ նախարար Արա Այվազյանի միջև: Ինչպես հայտնում է ՌԴ ԱԳՆ մամուլի ծառայությունը, կողմերը քննարկել են Ռուսաստանի, Ադրբեջանի և Հայաստանի ղեկավարների՝ ԼՂ-ում լիակատար հրադադարի մասին հայտարարության իրականացման ընթացքը:
«Արտաքին քաղաքականության գերատեսչությունների ղեկավարները քննարկել են Լեռնային Ղարաբաղի հակամարտության գոտում հրադադարի մասին Իլհամ Ալիևի, Վլադիմիր Պուտինի և Նիկոլ Փաշինյանի միջև նոյեմբերի 9-ին ձեռք բերված համաձայնության իրագործմանն առնչվող հարցերը»,- ասվում է ՌԴ ԱԳՆ հաղորդագրության մեջ:
Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։
Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա:










