Դա ընդամենը միֆ է. փոխնախարարը՝ «Իմ քայլը»–ի պատգամավորների հիմնավորման մասին, թե ծխախոտի գովազդից խանութներն ու կրպակները 10 մլն դոլար եկամուտ են ստանում

15:50 • 28.12.20

Այս նախագիծը երկրի իրավիճակի բարելավմանը չի նպաստելու, ընդհակառակը, այն հարված է հասցնելու առողջապահական համակարգին: Այս մասին Ազգային ժողովում ասաց ՀՀ առողջապահության նախարարի տեղակալ Լենա Նանուշյանը՝ անդրադառնալով «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին օրենքի» նախագծով սահմանված երեք դրույթների ուժի մեջ մտնելու ժամկետը մինչև 2022 թվականի հունվարի 1-ը երկարաձգելու օրենքի նախագծին:

Նախագիծը ներկայացրել են «Իմ քայլը» խմբակցության պատգամավորներ Բաբկեն Թունյանը, Վլադիմիր Վարդանյանը, Հովիկ Աղազարյանն ու Նարեկ Զեյնալյանը:

«Հայաստանի Հանրապետության այս դժվարին ժամանակաշրջանում մեզ համար անակնկալ էր ծխախոտի օրենքին անդրադարձը, մեր կարծիքով՝ սա այն նախագիծը չէ, որ պետք է հրատապ քննարկվի այս օրերին: Այս նախագծով առաջարկվում է ևս մեկ տարի շարունակել ծխախոտի և տաքացվող ծխախոտի անվերահսկելի գովազդը, որ ծխախոտի տուփերը տեղակայվեն մեր երեխաների տեսողության մակարդակին և գրավեն իրենց»,- ասաց Լենա Նանուշյանը:

Փոխնախարարը նշեց, թե կարծում է, որ չպետք է որևէ արտոնություն տրվի որևէ ծխախոտային արտադրատեսակի և վստահեցրեց, որ ԵԱՏՄ-ի հետ խնդիրներ ևս չկան:

«Միայն երեք կետից մեկի համար է տնտեսական հիմնավորում բերվում և 10 միլիոն դոլար (նկատի ունի խանութներում, կրպակներում ծխախոտի գովազդից ստացվող տարեկան գումարը – Tert.am) թիվ է ներկայացրել Բաբկեն Թունյանը, վարչապետի հանձնարարությամբ ամբողջ կառավարությունը փորձեց գտնել այդ 10 միլիոնը որտեղ է, ցավոք որևէ մեկը չկարողացավ գտնել՝ այդ թվում նաև ՊԵԿ-ը: Հասկանալի է չէ՞, որ դա ընդամենը միֆ է, հարգելի պատգամավորներ»,-ասաց նա:

Նա նաև նշեց, որ կորոնավիրուսային հիվանդության ընթացքում հասկացանք, որ ճիշտ ճանապարհ ենք ընտրել, քանի որ մարդիկ ուղեկցվող հիվանդություններից են մահանում և դրա համար առաջին ռիսկը ծխախոտն է: «Միջազգային փորձագետները գնահատել են, որ եթե մեր ամբողջ բնակչությունը հիվանդանա, նրանցից 117 հազար մարդ բարձր ռիսկի տակ է գտնվում ծայրահեղ ծանր հիվանդությունը տանելու և մահանալու՝ միայն ծխելու պատճառով»,- ասաց նա:

Լենա Նանուշյանը նաև նշեց, որ միջազգային փորձագետների հետ հաշվարկներ են արել, որ ծխախոտը շատ թանկ է նստում երկրի վրա: «Մեր երկրի տնտեսությունը տարեկան կորցնում է 273 միլիարդ դրամ, ինչը համարժեք է ՀՆԱ-ի 4,2 տոկոսին: Գնահատեցինք, թե այս նախագիծը, որքան կնստի մեր երկրի վրա և եթե ընդունվի և մեկ տարով երեք դրույթները հետաձգվեն, երկրի տնտեսությունը կկորցնի 35 միլիոն դոլար միայն 2021 թվականի ընթացքում և արդյունքում կունենանք 310 մահ»,-ասաց նա և կոչ արեց դեմ քվեարկել հանուն առողջ սերունդների:

Նա տեղեկացրեց, որ Կառավարությունը բացասական եզրակացություն է ներկայացրել նախագծին, իսկ ՊԵԿ-ը նշել է, որ որևէ առաջարկ չունի: