Մենք արժանապատիվ մարդիկ ենք՝ Եռաբլուրի լիիրավ տերերը, իսկ Ձեր՝ այդպես անպատիվ ձևով Եռաբլուր գալն ու գնալը պատիվ չբերեց Ձեզ. սևազգեստ մայրը՝ Փաշինյանին

16:37 • 29.12.20

Պարո՛ն վարչապետ, Ձեզ եմ դիմում, աշխատեք, որ ձեր իշխանական ֆեյքերը չսևացնեն մեր սևազգեստ մայրերին և այրիներին, աշխատեք, որ մեզ սրբացնեք: Այս մասին Եռաբլուրում լրագրողների հետ զրույցում հայտարարեց սևազգեստ մայրերից մեկը:

«Մենք արժանապատիվ մարդիկ ենք՝ Եռաբլուրի լիիրավ տերերը, իսկ Դուք արժանապատվորեն չեկաք Եռաբլուր, Ձեր՝ այդպես անպատիվ ձևով Եռաբլուր գալն ու գնալը Ձեզ պատիվ չբերեց»,- ասաց նա:

Նա նշեց, որ դիմում է ֆեյքերին, ոչ թե խնդրում է, այլ հրամայում, որ հանգիստ թողնեն իրենց՝ սևազգեստ մայրերին: «Պարո՛ն վարչապետ, Նիկո՛լ Փաշինյան, «Մարտի 1-ի» պահով էլ մեզ պատասխանեք, իրենց 30 մլն եք տալիս, մեզ 30 հազար, ինչի՞ համար է այդ տարանջատումը, մենք հո Ձեր ասած էլիտան չե՞նք»,- ասաց նա և հավելեց, որ իրենք այսպես, թե այնպես արժանապատիվ ապրում են:

«Մենք արժանապատվ ապրում ենք, մեր ամուսինները, որդիները զոհվել են, բայց մեր արժանաատվութունը չի զոհվել, ֆեյքերիդ եմ դիմում և հրամայում եմ, էդ ֆեյքերը հեռացրեք մեր մայրերից»,- նշեց նա: