Թուրքիան և ԱՄՆ-ն C-400-ի հարցով աշխատանքային խումբ են ստեղծել

16:57 • 30.12.20

Թուրքիան և ԱՄՆ-ն համաձայնության են հասել Անկարայի կողմից ռուսական C-400 հակաօդային պաշտպանության համակարգերի գնման հետ կապված աշխատանքային խումբ ստեղծելու հարցում: Այս մասին հայտնում է «ՌԻԱ Նովոստին»՝ Թուրքիայի ԱԳՆ ղեկավար Մևլյութ Չավուշօղլուի խոսքերին հղումով:

Նա, մասնավորապես, նշել է. «ԱՄՆ-ի հետ աշխատանքային խումբ է ստեղծվել C-400-ի հարցով, սկսվել են տեխնիկական բանակցությունները»:

Հիշեցնենք՝ Ռուսաստանի նորագույն C-400 հակաօդային պաշտպանության համակարգերի մատակարարումները, որենք ճգնաժամ են առաջացրել ԱՄՆ-ի հետ Թուրքիայի հարաբերություններում, սկսվել են 2019-ի հուլիսի կեսերին:

Մասնավորապես, պաշտոնապես Վաշինգտոնը պահանջել է հրաժարվել գործարքից և փոխարենը գնել ամերիկյան Patriot համակարգերը` սպառնալով հետաձգել կամ նույնիսկ չեղարկել վերջին «Ֆ-35» կործանիչների վաճառքը Թուրքիային, ինչպես նաև պատժամիջոցներ կիրառել՝ ըստ «Ամերիկայի հակառակորդներին պատժամիջոցների միջոցով հակազդեցության» մասին օրենքի:

Պաշտոնական Անկարան հրաժարվել էր կատարել ԱՄՆ պահանջը և շարունակել է բանակցություններ վարել լրացուցիչ խմբաքանակի շուրջ: