«Գերմանական բանակում ԱԹՍ-ները չեն օգտագործվի այնպես, ինչպես դա արվել է ԼՂ հակամարտությունում». Բունդեսվերում մերժել են մարտական ԱԹՍ-ների հասցեին հնչող քննադատությունները

14:31 • 03.01.21

Գերմանիայի Զինված ուժերի գլխավոր տեսուչ Էբերհարդ Ցորնը համաձայն չէ Գերմանիայի Սոցիալ-դեմոկրատական կուսակցության մտահոգությանը՝ Բունդեսվերը (Գերմանիայի Դաշնային Հանրապետության զինված ուժեր, - Tert.am) մարտական անօդաչու թռչող սարքերով (ԱԹՍ) զինելու հարցում: Այս մասին Ցորնը հայտնել է այսօր՝ հունվարի 3-ին, Welt am Sonntag պարբերականում հրապարակված հարցազրույցում, հայտնում է Deutsche Welle-ն:

Նա, մասնավորապես, նշել է. «Ես այն կարծիքին եմ, որ զինված անօդաչուների ռազմական պահանջը անփոփոխ է մնում: Եվ ոչ թե երբևիցե, այլ հենց արտասահմանյան առաքելությունների ընթացքում, որոնք այսօր իրականացնում ենք»:

Բացի այդ՝ տեսուչն ընդգծել է, որ համանման սարքերն անհրաժեշտ են օդից զինվորների պաշտպանության և տեղերում նրանց օպերատիվ ներուժի բարելավման համար:

Նշվում է՝ իշխող կոալիցիայում պահպանողականների գործընկեր Գերմանիայի ՍԴԿ-ն 2020 թվականի դեկտեմբերին հրաժարվել էր հավանություն տալ նոր զինված ԱԹՍ-ների գնմանը:

Այս առնչությամբ ԳՍԴԿ խորհրդարանական խմբակցության փոխնախագահ Գաբրիելա Հայնրիխն հայտարարել էր՝ իրադարձությունը, որը սոցիալ-դեմոկրատներին ստիպել էր նման որոշում կայացնել, Լեռնային Ղարաբաղում հակամարտությունն էր և «ԱԹՍ-ների պատերազմը», որը վարել են Հայաստանն ու Ադրբեջանը:

«Պատմության մեջ առաջին անգամ զինված հակամարտության ելքը որոշել է բացառապես անօդաչուների կիրառումը»,- շեշտել էր նա:

Միևնույն ժամանակ էլ Ցորնը վստահ է, որ Ղարաբաղում հակամարտությունը չպետք է կասկածի տակ դնի Բունդեսվերի համար անօդաչուների գնումը:

«ԼՂ-ում զինված ԱԹՍ-ներն օգտագործվել են որպես հարձակողական զենք: Իսկ Բունդեսվերի կողմից զինված անօդաչուների կիրառումը կկարգավորվեր հստակ կանոններով, որոնք մեր խորհրդարանն ավելի վաղ հաստատել է և ամրագրել համապատասխան մանդատում»,- բացատրել է պաշտոնյան ու ավելացրել, որ գերմանական բանակում ԱԹՍ-ները չեն օգտագործվի այնպես, ինչպես դա արվել է Ղարաբաղյան հակամարտությունում:

Հիշեցնենք՝ Գերմանիայի պաշտպանության նախարարությունը վերջին շրջանում սոցիալ-դեմոկրատների խնդրանքով մեկ անգամ չէ, որ հանդես է եկել զինված ԱԹՍ-ների հարցի շուրջ բանավեճերի նախաձեռնությամբ: Դրանց մասնակցելու համար հրավիրվել են զինծառայողներ, իրավապաշտպաններ, քաղաքական գործիչներ, ինչպես նաև պաշտպանական ոլորտի մի շարք փորձագետներ:

Այս առնչությամբ ԳՍԴԿ դեկտեմբերյան դեմարշին Գերմանիայի պաշտպանության նախարար Աննեգրետ Քրամփ-Քարենբաուերը նկատելի զայրույթով էր արձագանքել:

«Հաշվի չի առնվում «մենք այդ հարցը չենք քննարկել» փաստարկը. մենք արդեն 8 տարի այս հարցը քննարկում ենք»,- 2020 թվականի դեկտեմբերի 9-ին Բունդեսթագում պաշտպանական բյուջեի քննարկման ընթացքում հայտարարել էր պաշտոնյան: