Թրամփը կստանա իր պատիժը գեներալ Սոլեյմանիի սպանության համար. Իրանի դատական իշխանության ղեկավար

18:24 • 04.01.21

Իրանի դատական իշխանության ղեկավար Սեյեդ Իբրայիմ Ռաիսին ԱՄՆ գործող նախագահ Դոնալդ Թրամփին հիշեցրել է, որ վերջինս չի կարող խուսափել պատժից ԻՀՊԿ հատուկ ստորաբաժանման հրամանատար Ղասեմ Սոլեյմանիի սպանությունը պատվիրելու համար:

Ինչպես փոխանցում է «Թանսիմ» գործակալությունը, այս մասին Ռաիսին հայտարարել է լիբանանյան «Ալ-Մանար» հեռուստաալիքին տված հարցազրույցում՝ շեշտելով, ոչ Թրամփն իր պատիժը կստանա՝ անկախ այն հանգամանքից կլինի ԱՄՆ նախագահի պաշտոնում, թե ոչ:  

«Թրամփը հանցագործություն է գործել՝ սպանելով գեներալ Սոլեյմանիին և բացեիբաց ընդունել է, որ ինքն է տվել ավիահարվածի հրամանը»,- ասել է Ռաիսին՝ հավելելով, որ սպանության կազմակերպմանը ներգրավված բոլոր անձինք հայտնաբերվել են:

Գեներալի սպանությունը վերջինս գնահատել է որպես պետականորեն հովանավորվող ահաբեկչություն, որն իրականացվել է երրորդ երկրում, ուր որպես հյուր այցելել էր իրանցի հրամանատարը:  

Անցյալ շաբաթ իրանցի դատավորը հայտնել էր, որ գեներալ Սոլեյմանիի սպանությանը ներգրավված ամերիկացիների ցանկն ընդլայնվել է՝ ներառելով 48 մարդու:

 Հիշեցնենք, որ Իրանի «Իսլամական հեղափոխության պահապանների կորպուսի» «Ղոդս» հատուկ ստորաբաժանման հրամանատար, գեներալ-լեյտենանտ Ղասեմ Սոլեյմանին սպանվել է 2020 թվականի հունվարի 3-ին Բաղդադի օդանավակայանի ուղղությամբ հասցված ամերիկյան ավիահարվածի ժամանակ: