Սոլեյմանին ոչ միայն խաղաղասեր հերոս էր, այլև մեծագույն դիվանագետ. Զարիֆ

12:43 • 04.01.21

Իրանի արտաքին գործերի նախարար Մոհամմադ Ջավադ Զարիֆը, ոգեկոչելով «Իսլամական հեղափոխության պահապանների կորպուսի» հատուկ ստորաբաժանման հրամանատար Ղասեմ Սոլեյմանիի հիշատակը, ընդգծել է, որ վերջինս ոչ միայն խաղաղասեր հերոս էր, այլև մեծագույն դիվանագետ:

Ինչպես փոխանցում է «Մեհր» գործակալությունը, նման ելույթով իրանցի նախարարը հանդես է եկել կիրակի երեկոյան տեղի հեռուստատեսությանը տված հարցազրույցում:

«Որպես մարդ, որը մշտապես աշխատել է խաղաղության և բանակցությունների ոլորտում, ես գեներալ Սոլեյմանիին դիտարկել եմ ոչ միայն որպես պարզապես չեմպիոնի՝ ահաբեկիչների դեմ պայքարում, այլ նաև որպես խաղաղապահական ջանքեր գործադրող հերոսի»,- ասել է Զարիֆը:

Նրա խոսքով՝ Սոլեյմանին առանձնահատուկ կերպար էր, որը կողմ էր հանդես գալիս պատերազմներին վերջ դնելուն, հատկապես Աֆղանստանում և Սիրիայում: Զարիֆը հավելել է, որ խորհուրդներ է ընդունել միայն գեներալ Սոլեյմանիից:  

Հարցազրույցը նախարարը տվել է ԻՀՊԿ «Ղոդս» հատուկ ստորաբաժանման հրամանատար, գեներալ-լեյտենանտ Ղասեմ Սոլեյմանիի մահվան առաջին տարելիցի օրը: Հիշեցնենք, որ վերջինս սպանվել է 2020 թվականի հունվարի 3-ին Բաղդադի օդանավակայանի ուղղությամբ հասցված ամերիկյան ավիահարվածի ժամանակ: