Այն միամիտները, որոնք մտածում են, թե թուրքերին, ադրբեջանցիներին զիջելով՝ կարողանալու են կասեցնել նրանց նկրտումները, սխալվում են. թուրքը շարունակելու է լարվածություն է հարուցել. թուրքագետ (տեսանյութ)
Մեր երկրում ամեն ոլորտում ապազգային, հայրենադավ կերպարներ են, որոնց համար ՀՀ տարածքներն ադրբեջանական են, ազատագրողները՝ հանցագործ օկուպանտներ: Այս մասին այսօր կայացած ասուլիսին հայտարարեց թուրքագետ Ռուբեն Մելքոնյանը՝ անդրադառնալով այն անձանց հայտարարություններին, համաձայն որոնց, օրինակ, Սյունիքի Շուռնուխ համայնքի՝ Ադրբեջանին հանձնվող տարածքները ադրբեջանական են:
«Այն ամենը, ինչ հիմա կատարվում է Շուռնուխում, որևէ կապ չունի դեմարկացիայի՝ սահմանազատման հետ: Դա կապիտուլյացիոն ինչ-որ ենթաշերտ է, որ բխում է նոյմեբերի 9-ի խայտառակ պայմանագրից: Այն, ինչին հիմա մենք ականատես ենք լինում, ոչ մի հիմք չունի՝ որ թվականի քարտեզի վրա է կատարվում, ինչի հիման վրա: ԽՍՀՄ-ում՝ ընդհանուր պետության մեջ գոյություն են ունեցել Հայաստան և Ադրբեջան, և ընդհանուր պետության մեջ գոյություն ունեցող սահմանները չի կարելի հիմք ընդունել: Սա ուղղակի կապիտուլյացիա է, որը իշխանական քարոզչամեքենան ներկայացնում է որպես ինքնախաբեության, ինքնաարդարացման գաղափար»,-ասաց թուրքագետը:
Նրա խոսքով՝ երկու հակամարտող ազգեր, որոնք կարճ ժամանակ առաջ իրար կրակում էին, չէին կարող ունենալ շփման այդպիսի մոտիկ գիծ. դա ենթադրում է նոր սպանություններ, բախումներ:
Ըստ Մելքոնյանի՝ սա նոր ճգնաժամերի սկիզբ է: «Այն միամիտները, թրքաբարո հայերը, որոնք մտածում են, թե թուրքերին, ադրբեջանցիներին զիջելով՝ կարողանալու են կասեցնել նրանց նկրտումները, չարաչար սխալվում են: Թուրքը շարունակելու է մինչև վերջ պնդել, նոր տարածք ուզել, անընդհատ լարվածություն է հարուցելու, հնարավորության դեպքում գերի է վերցնելու, սպանելու է»,-ասաց Մելքոնյանը:
Նա ընդգծեց՝ Թուրքիան Հայաստանի հետ հարաբերություններ հաստատելու համար ուներ երեք նախապայման՝ Հայոց ցեղասպանության միջազգային ճանաչումից հրաժարում, Արցախի հարց, և Թուրքիայի հանդեպ տարածքային պահանջներից հրաժարվելու հարց:
«Այս երեք նախապայմաններից Արցախի հարցը վերացավ, որովհետև թուրք-ադրբեջանական տանդեմն օկուպացրել է մեր հայրենիքի մի մասը: Թուրքիան հիմա հայտարարում է, որ դեմ չէ Հայաստանի հետ սահմանների բացմանը: Եթե երեք նախապայմաններից մեկը վերացավ, այդ երկու նախապայմանները արդյո՞ք այս խեղճացած, թույլ, դիմադրողականության 0 մակարդակ ունեցող իշխանության համար լուրջ, սկզբունքային հարց է: Իհարկե ոչ: Չեմ բացառում, որ թուրքական այս երկու նախապայմաններն էլ այս իշխանության պայմաններում կարող են կյանքի կոչվել»,-ասաց Մելքոնյանը:
Նրա խոսքով՝ այս իշխանությունը պարտվել է բոլոր առումներով, բոլոր ոլորտներում, սակայն ամուր կառչում է աթոռներից ու պայքարում իր համաքաղաքացիների դեմ. «Սա որևէ քաղաքագիտական նորմի մեջ չի տեղավորվում»,-նշեց նա:










