Իրանական բանակի ցամաքային ուժերը զորավարժություններ կանցկացնեն երկրի սահմանի տարբեր հատվածներում

16:30 • 10.01.21

Իրանի բանակի ցամաքային ուժերի հրամանատար, բրիգադային գեներալ Քիոմարս Հեյդարին կիրակի հայտարարել է, որ իր ղեկավարած ուժերը մոտ ապագայում զորավարժություններ են իրականացնելու երկրի հարավային շրջաններում:

Ինչպես փոխանցում է «Մեհր» գործակալությունը, իրանցի հրամանատաի խոսքով՝ նախատեսված զորավարժություններն իրականացվելու են այլ իրանական ուժերի աջակցությամբ՝ ողջ ռազմական տեխնիկայի կիրառմամբ:

«Ուսումնավարժանքներն անցկացվելու են իրանական զինուժի մարտունակության պահպանման, ինչպես նաև պաշտպանական ունակությունների արդիականացման նպատակով: Դրանք կիրականացվեն երկրի հարավարևելյան շրջաններում և իրանական սահմանի տարբեր հատվածներում»,- մեկնաբանել է գեներալը:

Հիշեցնենք, որ օրեր առաջ իրանական օդուժը խոշորամասշտաբ զորավարժություններ է իրականացրել Սեմնանի նահանգնում, որոնց ընթացքում առաջին անգամ կիրառվել են արհեստական բանականությամբ աշխատող և տեղական արտադրության «կամիկաձե» անօդաչու թռչող սարքեր: