Դեմոկրատ օրենսդիրները հայտնում են, որ Թրամփի զինված աջակիցները մտադիր են կրկին շրջափակել Կապիտոլիումը. CNN  

22:44 • 12.01.21

 

ԱՄՆ գործող նախագահ Դոնալդ Թրամփի հազարավոր զինված աջակիցներ պատրաստվում են շրջափակել Կապիտոլիումի շենքը նորընտիր նախագահ Ջո Բայդենի երդմնակալությանն ընդառաջ: Այս մասին հայտնում է CNN-ը՝ վկայակոչելով Կոնգրեսի քաջատեղյակ անդամին:

Հեռուստաալիքի տվյալներով՝ մի շարք օրենսդիրներ նախօրեին ևս հայտնել են առաջիկայում սպասվող խռովությունների վտանգի մասին:

«Նրանք խոսում են մոտ 4000 զինված «հայրենասերների» մասին, որոնք մտադիր են շրջափակել Կապիտոլիումը՝ կանխելու համար դեմոկրատների մուտքը: Նրանք կանոնների ցանկ են հրապարակել՝ նշելով, թե երբ է պետք կրակել, երբ՝ ոչ: Սա կազմակերպված խումբ է, որը ծրագիր ունի»,- հեռուստաալիքի հետ զրույցում ասել է Ներկայացուցիչների պալատի դեմոկրատ անդամ Քոնոր Լեմբը:

Այսօր Ներկայացուցիչների պալատում քննարկումներ են ընթանում Թրամփի իմփիչմենթի հարցով: Հիշեցնենք, որ դեմոկրատները նախօրեին Կոնգրեսի ստորին պալատի դիտարկմանն էին ներկայացրել իմփիչմենթի մասին բանաձևը, որը քննարկումներից հետո կարող է քվեարկության ներկայացվել:

Հիշեցնենք, որ Թրամփի կողմնակիցները Կապիտոլիում էին ներխուժել հունվարի 6-ին, երբ կոնգրեսականները հավաքվել էին հաստատելու Ջո Բայդենի հաղթանակը նոյեմբերի 3-ին կայացած նախագահական ընտրություններում: