Հռոմի պապը պատվաստվել է կորոնավիրուսի դեմ
Հռոմի Ֆրանցիսկոս պապը պատվաստվել է կորոնավիրուսի դեմ: Ինչպես հայտնում է արգենտինական La Nacion պարբերականը՝ հղում անելով վատիկանյան աղբյուրներին, 84-ամյա քահանայապետը ստացել է պատվաստման առաջին չափաբաժինը: Երեք շաբաթից տեղի կունենա երկրորդ ներարկումը:
Պատվաստման գործընթացը Վատիկանում մեկնարկել է այսօր առավոտյան, երբ տեղ է հասել ամերիկա-գերմանական ընկերությունների համատեղ արտադրության Pfizer/BioNTech պատվաստանյութի առաջին խմբաքանակը, և Հռոմի պապը դարձել է առաջիններից մեկը, ով պատվաստվել է:
Նշվում է, որ լուսանկարներ չեն արվել պատվաստման ժամանակ՝ ելնելով գաղտնիության սկզբունքից:
Հիշեցնենք, որ օրեր առաջ իտալական հեռուստատեսությանը տված հարցազրույցում Ֆրանցիսկոս պապը հայտնել էր, որ այս շաբաթ Վատիկանում մեկնարկելու է պատվաստման գործընթացը: Վերջինս պատվաստվելն անվանել էր յուրաքանչյուրի «էթիկական պարտքը»:










