Խիստ մտահոգված ենք Ադրբեջանի կողմից նոյեմբերի 9-ի հայտարարության առանցքային դրույթների շարունակական խախտումներով. Արա Այվազյան (տեսանյութ)

15:08 • 14.01.21

ԱԺ-ում աշխատանքային հանդիպում է տեղի ունենում ԱԳ նախարար Արա Այվազյանի մասնակցությամբ․ հանդիպումը իրականացվում է փակ, հանդիպմանը չեն ներկայացել ԼՀԿ և ԲՀԿ ներկայացուցիչները:

Իր բացման խոսքում Արա Այվազյանն անդրադարձավ նոյեմբերի 9-ին ստորագրված հայտարարությանը և նշեց, որ հրադադարի վերջին լուրջ խախտումը տեղի է ունեցել երեկ, ինչի հետևանքով վիրավորվել է զինծառայող:

«Խիստ մտահոգված ենք Ադրբեջանի կողմից հայտարարության առանցքային դրույթների շարունակական խախտումներով»,-ասաց նա և նշեց, որ Հայաստանը կշարունակի իր ջանքերը բոլոր ռազմագերիների և պատանդների վերադարձման, անհետ կորածների ճակատագրի պարզաբանման ուղղությամբ:

«Տարածաշրջանում ստեղծված իրավիճակը ուժի կիրառման հետևանք է, դեռևս ոչ մի հակամարտություն չի կարգավորվել ուժի կիրառմամբ»,-հայտարարեց նա:

Նախարարը նշեց նաև, որ Հայաստան շարունակելու է հանդես գալ Արցախի ժողովրդի ինքնորոշման իրավունքի դիրքերից, պատրաստ է ԼՂ հակամարտության խաղաղ կարգավորման գործընթացը իրականացնել Մինսկի խմբի համանախագահությամբ` հիմնված հիմնարար սկզբունքների վրա: