Նա Նիկոլի նշանակած խամաճիկն է, նրա առաքելությունը ամեն ինչ տեսնելն ու լռելն է. Աննա Գրիգորյանը՝ ՀՀ նախագահի մասին

14:24 • 05.07.22

 

Այստեղ նստող անձը ոչ թե ՀՀ նախագահն է, այլ ՔՊ խմբակի կողմից ընտրված, կամ ավելի ճիշտ՝ Նիկոլի կողմից նշանակված խամաճիկը: Այս մասին «Դիմադրության» շարժման բողոքի ակցիայի ժամանակ ՀՀ նախագահի նստավայրի դիմաց հայտարարեց «Հայաստան» խմբակցության պատգամավոր Աննա Գրիգորյանը։

Նրա խոսքով՝ Վահագն Խաչատուրյանն այդ պաշտոնին է գործուղվել, ոչ թե Սահմանադրությունը, այլ ՔՊ շահերը պաշտպանելու համար:

«Նա այստեղ է եկել, որպեսզի լռի, իր հիմնական առաքելությունն այստեղ ամեն բան տեսնելը և ամեն ինչի մասին լռելն է: Նա լռում է, երբ խախտվում է ՀՀ տարածքային ամբողջականությունը, երբ ՀՀ սուվերեն տարածքից առևանգվում է հայ զինծառայող: Այստեղ նստած անձը դակում, ստորագրում է ցանկացած օրենք, որը գալիս է ԱԺ-ից, բայց ծպտում չի հանում, երբ հրապարակվում է Գագիկ Ջհանգիրյանի մասնակցությամբ ձայնագրությունը, որն ուղղակի շանտաժի մասին էր: Այստեղ նստող մարդը պետք է Սահմանադրության ոգին ու տառը պահեր, նորից լռում է, երբ քաղաքական ճգնաժամ կա, երբ հատուկ միջոց է կիրառվում ժողովրդի նկատմամբ, հետապնդվում է ցանկացած մեկը, որն այլախոհ է»,- ասաց պատգամավորը և ցույց տվեց քաղբանտարկյալների նկարները:

Աննա Գրիգորյանի կարծիքով՝ խորհրդարանական երկրում  նախագահական ինստիտուտն անարգվել է և հիշեցրեց, որ նախկին նախագահը՝ Արմեն Սարգսյանը, հրաժարական է ներկայացրել մեկ այլ երկրի տարածքից:

«Այստեղ նստողը հրաժարական չի տվել, բայց միևնույն է՝ չկա: Նրա փոխարեն ցանկացած մեկը լիներ՝ նույն բանն էր լինելու, կամ առհասարակ, եթե նրա աթոռը թափուր լիներ, դրանից որևէ բան չէր փոխվելու, որովհետև նա ունի 0 գործառույթ, որը վերաբերում է երկրի շահերին»,- հայտարարեց Գրիգորյանը և շեշտեց, որ չնայած այդ ամենին իրենք  ժողովրդի հետ վերկանգնելու են Սահմանադրության տառն ու ոգին: