Մի սկանդալից՝ մյուսը. Ֆինլանդիայի վարչապետը ներողություն է խնդրել իր պաշտոնական նստավայրում արված խնդրահարույց լուսանկարի պատճառով (լուսանկար)
Ֆինլանդիայի վարչապետ Սաննա Մարինը ներողություն է խնդրել իր նստավայրում արված վիճահարույց լուսանկարի համար, որում երկու երիտասարդ կին, շապիկները վեր բարձրացրած, համբուրվում են՝ կրծքերը ծածկելով «Ֆինլանդիա» գրությամբ:
Ինչպես նկատում է The Guardian-ը, այս միջադեպը տեղի է ունեցել վարչապետի մասնակցությամբ սկանդալից ընդամենը մի քանի օր անց: Հիշեցնենք, որ Մարինը ստիպված է եղել օրգանիզմում թմրանյութի առկայության թեստ հանձնել այն բանից հետո, երբ համացանցում տարածվել էր նրա մասնակցությամբ մասնավոր խնջույքից մի տեսանյութ, որից կարելի էր ենթադրել, որ այնտեղ թմրանյութեր են օգտագործվել: Սակայն վարչապետի թեստի պատասխանը բացասական է եղել:
Ինչ վերաբերում է նստավայրում համբուրվող կանանց մասնակցությամբ սկանդալին, ապա 36-ամյա Մարինը հաստատել է, որ լուսանկարն արվել է Կեսարանտայի իր պաշտոնական նստավայրում՝ հուլիսին:
«Կարծում եմ՝ լուսանկարը պատշաճ չէ: Ներողություն եմ խնդրում դրա համար: Նման լուսանկար չպետք է արվեր»,-ասել է լրագրողներին երկրի ղեկավարը:
Նա հավելել է, որ «ընկերների հետ նստավայրում ժամանակ են անցկացրել, սաունա գնացել»:
Լուսանկարն առաջին անգամ հրապարակվել է Միսս Ֆինլանդիայի նախկին մասնակցի TikTok-ի էջում։ Այդ կինը երկու համբուրվողներից մեկն է:
Մարինը, որն իշխանության է եկել 2019 թվականին 34 տարեկանում, նախկինում քննադատության թիրախ է դարձել իր պաշտոնական նստավայրում խնջույքների վերաբերյալ:
Նշենք, որ վարչապետն ամուսնացած է, ունի երեխա:














