Տոկիոյում զանգվածային բողոքի ցույցեր են նախկին վարչապետ Սինձո Աբեի պետական հուղարկավորության դեմ

09:37 • 27.09.22

Տոկիոյում զանգվածային բողոքի ցույցեր են երկրի նախկին վարչապետ Սինձո Աբեի պետական հուղարկավորության արարողության դեմ։ Հարյուրավոր մարդիկ դուրս են եկել փողոց՝ կառավարության որոշման հետ իրենց անհամաձայնությունը հայտնելու, գրում է ՌԻԱ Նովոստին։

Ուղղաթիռից արված կադրերում երևում է, թե ինչպես են հավաքվածներն իրավապահների հսկողողւթյան ներքո քայլում Nippon Budokan մարտարվեստի սրահի մոտ գտնվող փողոցներով։ Հենց այս սրահում էլ ավելի ուշ նախատեսվում է անցկացնել սպանված նախկին վարչապետի պետական հուղարկավորությունը։

Ցուցարարներից շատերի ձեռքին «Դեմ ենք պետական հուղարկավորությանը» և «Չեղարկեք հուղարկավորությունը» գրությամբ պաստառներ են։ Որոշ ակտիվիստների ոստիկանները շրջապատել են ու փորձում են դուրս բերել ամբոխի միջից։

Հիշեցնենք, որ Ճապոնիայի նախկին վարչապետ Սինձո Աբեն  սպանվել է Ճապոնիայի Նարա քաղաքի փողոցներում նախընտրական հանրահավաքի ժամանակ ելույթ ունենալիս։ Միջադեպը տեղի է ունեցել հուլիսի 8-ին։ Աբեն 67 տարեկան էր։ Քաղաքական գործչի մարմինը դիակիզվել է հուլիսի 12-ին։