Պահանջարկը գերազանցել է առաջարկին․ Էկոնոմիկայի նախարարությունից պարզաբանում են՝ ինչու է շուկայում ցեմենտի դեֆիցիտ առաջացել
Վերջին շրջանում քաղաքացիների և մասնավորապես կառուցապատողների կողմից բազմաթիվ բողոքներ էին հնչում այն մասին, որ հայաստանյան շուկայում նկատվում է ցեմենտի դեֆիցիտ և գինը շուկայում բարձրացել է։ Tert.am-ը հարցում է ուղարկել Էկոնոմիկայի նախարարություն՝ հասկանալու՝ արդյոք ցեմենտի ներմուծման ծավալները նվազել են և ինչով են պայմանավորված ցեմենտի շուկայում առաջացած խնդիրները գնային փոփոխությունները։
Էկոնոմիկայի նախարարությունից հարցմանն ի պատասխան նշել են, որ հունվար-օգոստոս ամիսներին շինարարության ծավալները աճել են 14.2%-ով, ինչի հետևանքով պահանջարկը որոշակիորեն գերազանցել է առաջարկին։
Համաձայն ՀՀ ՊԵԿ վիճակագրական տվյալների 2022 թվականի 1-ին կիսամյակում Հայաստան է ներմուծվել 73.15 հազ. տոննա ցեմենտ, նախորդ տարվա նույն ժամանակահատվածի՝ 73.4 տոննայի դիմաց։ Ինչպես ցույց են տալիս ներմուծման ցուցանիշները՝ նշված ժամանակահատվածներում ներմուծվել է գրեթե նույն քանակի ցեմենտ, իսկ տեղական ցեմենտի արտադրության աճը կազմել է 20.6%։ Միաժամանակ հայտնել են, որ երրորդ երկրներից ցեմենտի ներմուծումը լիցենզավորվող գործունեություն սահմանելու պահանջը և լիցենզիաների տրամադրման համար պետական տուրքի չափերը սահմանվել էին՝ հաշվի առնելով ցեմենտի տեղական շուկայի հագեցվածությունը, երբ անհրաժեշտություն էր առաջացել ապահովել ցածր գնով ներմուծվող և տեղում արտադրվող ցեմենտի համար հավասար մրցակցային գներ։
Ներկայումս, հաշվի առնելով ցեմենտի տեղական շուկայի վարքագծի փոփոխությունը, մասնավորապես այն հանգամանքը, որ բավականին աճել են երրորդ երկրներից ձեռք բերման և տեղափոխման տրանսպորտային ծախսերը, որի արդյունքում աճել էին նաև վաճառքի գները, ինչպես նաև պահանջարկի աճը՝ սահմանվել է երրորդ երկրներից ցեմենտի յուրաքանչյուր մինչև հարյուր տոննայի ներմուծման լիցենզիա տրամադրելու համար պետական տուրք՝ բազային տուրքի 200-ապատիկի չափով (նախկին՝ 1400-ապատիկի փոխարեն), իսկ կլինկերի ներմուծման համար լիցենզիա ստանալու և պետական տուրք վճարելու պահանջը չեղարկվել է։










