Ուկրաինական ճգնաժամը պարզապես նախնական տաքացում է. մեծ հակամարտությունն առջևում է. ԱՄՆ ռազմավարական հրամանատարության հրամանատար

21:46 • 06.11.22

Միացյալ Նահանգների ռազմավարական հրամանատարության (Stratcom) հրամանատար,  Ռազմածովային ուժերի ծովակալ Չարլզ Ռիչարդը, նախազգուշացրել է, որ ուկրաինական ճգնաժամը նախնական տաքացում է, և որ ԱՄՆ-ն, ըստ բարձրաստիճան զինվորականի, պետք է պատրաստ լինի Չինաստանի մասնակցությամբ համաշխարհային հակամարտության, գրում է  newsweek.com-ը: 

«Ուկրաինական ճգնաժամը, որում մենք գտնվում ենք հենց հիմա, պարզապես նախնական տաքացում է (warmup, разминка- Tert.am)», - ասել է Ռիչարդը 2022 թվականի ռազմածովային սուզանավերի լիգայի ամենամյա սիմպոզիումի ընթացքում ելույթի ժամանակ:

«Մեծը (հակամարտությունը-Tert.am) գալիս է: Եվ շատ ժամանակ չի անցնի, երբ մենք կանցնենք այնպիսի փորձությունով, որով երկար ժամանակ չէինք անցել: Մենք պետք է ինչ-որ արագ, հիմնարար փոփոխություն կատարենք ազգի պաշտպանության մեր մոտեցումների հարցում...Երբ ես գնահատում եմ Չինաստանի դեմ մեր զսպման մակարդակը, ապա կարող եմ ասել, որ նավը կամաց-կամաց խորտակվում է: Այն դանդաղ է խորտակվում, բայց խորտակվում է, քանի որ սկզբունքորեն նրանք (չինացիներ-Tert.am) ավելի արագ են տեղակայում իրենց ուժերը, քան մենք: Քանի որ այս տարբերությունը մեծանում է, նշանակություն չի ունենա, թե որքան լավն են մեր հրամանատարները: Մենք գիտեինք, թե ինչպես արագ շարժվել, բայց մենք կորցրել ենք դրա արվեստը», - ասել է Ռիչարդը: 

Ծովակալի խոսքով՝ ԱՄՆ-ն մոռացել է, թե ինչպես պետք է «արագ գործել»։

Պենտագոնը հոկտեմբերի վերջին հրապարակել է ԱՄՆ պաշտպանության նոր ռազմավարությունը։ Այն երկու շաբաթ առաջ Սպիտակ տան կողմից հրապարակված Ազգային անվտանգության ռազմավարության շարունակությունն էր։ Պաշտպանության գերատեսչության փաստաթղթում որպես հիմնական սպառնալիք նշվում են ուժեղացող  Չինաստանը և «դեռևս» վտանգավոր Ռուսաստանը։