Թրամփի դեմ մահափորձից հետո Հանրապետական կուսակցության համագումարի անվտանգության ապահովման ծրագիրը կվերանայվի

16:43 • 14.07.24

Միլուոկիում ԱՄՆ Հանրապետական կուսակցության համագումարի անվտանգության ապահովման ծրագիրը կվերանայվի՝ ԱՄՆ նախկին նախագահ Դոնալդ Թրամփի դեմ մահափորձի պատճառով։

Այս մասին հայտնում է ABC News-ը՝ դաշնային պաշտոնյային հղում անելով:

Հիշեցնենք, որ ԱՄՆ Փենսիլվանիա նահանգում աջակիցների հետ հանրահավաքի ժամանակ նախագահի հանրապետական թեկնածու Դոնալդ Թրամփի դեմ մահափորձ է իրականացվել:

Հնչել են կրակոցներ, որից հետո նա ընկել է. Գաղտնի ծառայության աշխատկիցները մարմիններով ծածկել են նախկին նախագահին: Մահափորձից հետո Թրամփը տեղափոխվել է հիվանդանոց, նրա կյանքին վտանգ չի սպառնում: 

Ըստ ՀԴԲ-ի՝ կրակողը՝ 20-ամյա Թոմաս Մեթյու Քրուքսը, չեզոքացվել է: Նրա քայլի դրդապատճառն առայժմ անհայտ է: Իրավապահ մարմինները միջադեպի հետաքննություն են սկսել: