Երևանում և Արցախում տեղի կունենա «Դինամիկ համակարգերը, ոչ գծային անալիզը և նրանց կիրառությունը» միջազգային գիտաժողովը

Հուլիսի 11-ին Գիտությունների ազգային ակադեմիայում կմեկնարկի «Դինամիկ համակարգերը, ոչ գծային անալիզը և նրանց կիրառությունը» միջազգային գիտաժողովը:

Այն իր աշխատանքները հուլիսի 11-ին և 12-ին կշարունակի Երևանի պետական համալսարանի Ֆիզիկայի ֆակուլտետում, իսկ 14-15-ին` Ստեփանակերտում` Արցախի պետական համալսարանում: Այս մասին տեղեկացնում է ՀՀ ԳԱԱ տեղեկատվական վերլուծական կենտրոնը։

ԱՄՆ-ից, Կանադայից, Ֆրանսիայից, Ռուսաստանից, Չերնոգորիայից, Բելառուսից, Իրանից ժամանած մասնագետները հայ գիտնականների հետ միասին կքննարկեն դինամիկ համակարգերի ժամանակակից տեսության ակտուալ խնդիրները:

Գիտաժողովի կազմակերպիչներն են Գիտությունների ազգային ակադեմիայի Մաթեմատիկայի ինստիտուտը, Ինֆորմատիկայի և ավտոմատացման պրոբլեմների ինստիտուտը, Ռուսաստանի Գիտությունների ակադեմիայի Կենտրոնական տնտեսամաթեմատիկական ինստիտուտը, Երևանի պետական համալսարանը և Արցախի պետական համալսարանը։