Ուզբեկստանում բարոյական արժեքները կներդրվեն սոցիալական կայքի միջոցով

Ուզբեկստանում հայտնվել է նոր սոցիալական կայք, որը կոչվում է Muloqot.Uz («muloqot» թարգմանաբար նշանակում է «շփում»), հաղորդում է «Ինտերֆաքս»-ը:

Այն բացվել է որպես այլընտրանք ռուսական «ВКонтакте» և «Одноклассники» ու արևմտյան Facebook սոցիալական կայքերին: Կայքի պատասխանատուների տարածած հայտարարությունում ասված է, որ այդ նոր նախագիծը «պայմաններ է ստեղծում երիտասարդության բարոյական և ֆիզիկական առողջության բարելավման, բարձր բարոյականության ձևավորման» և այլնի համար:

Այժմ սոցիալական կայքն աշխատում է բետա տարբերակով: Դրա ամբողջական տարբերակը նախատեսվում է թողարկել սեպտեմբերի 1-ին՝ Ուզբեկստանի Անկախության օրը: