Արդարադատության նախարարությունը սկսել է ավելի թափանցիկ աշխատել. դիտորդական խումբ

12:17 • 26.12.14

ՀՀ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդական խումբն այսօր հրավիրված մամուլի ասուլիսի ժամանակ ամփոփեց  ազատազրկված անձանց իրավունքների պաշտպանության վիճակը Հայաստանում՝ նշելով, որ ՀՀ արդարադատության նախարարությունն սկսել է ավելի թափանցիկ աշխատել:


ՀՀ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդական խմբի նախագահ Ռուբեն Սարգսյանը նշեց, որ 2014 թվականի երկրորդ կեսից Արդարադատության  նախարարության աշխատանքներում զգալի փոփոխություններ են նկատելի: 


Նա ասաց, որ օրենսդրական փոփոխությունների մասով սկսվել է համագործակցությունը նախարարության հետ: «Արդարադատության նախարարությունը սկսել է ավելի թափանցիկ աշխատել և հաշվետու լինել»,-ասաց նա:


Ռուբեն Սարգսյանը նշեց, որ հիմնականում դատապարտյալները բարձրացնում են ՔԿՀ–ների գերծանրաբեռնվածության, բժշկական սպասարկման, վաղաժամկետ ազատման հետ կապված  խնդիրներ:


Հասարակական դիտորդական խմբի դիտորդ Հասմիկ Հարությունյանը նշեց, որ դիտորդական խումբն իր հերթին նախարարությանը ներկայացրել է առաջարկություններ: Նա ավելացրեց, որ անկախ հանձնաժողովը հիմնականում մերժում է վաղաժամկետ ազատման միջնորդությունը, և բավարարվող դիմումների թիվը նվազել է:


Հասարակական դիտորդական խմբի դիտորդ Նարե Մեսրոպյանն իր հերթին ասաց, որ եթե որոշ ՔԿՀ–ներում կա բժիշկ մասնագետների պակաս, ապա կա նաև ՔԿՀ, որտեղ  ընդհանրապես բժիշկ չկա:


Նա բարձրացրեց նաև ՔԿՀ-ների բժիշկների վերապատրաստման հարցը.«Բժիշկները խնդրում են,որ իրենց ևս ներգրավեն վերապատրաստման գործընթացին»,-ասաց նա և, հատկապես, կարևորեց հոգեբույժների ներգրավվածությունը, քանի որ կան դատապարտյալներ, ովքեր ունեն նրանց կարիքը: Նրա խոսքով ՔԿՀ–երում կա նաև բժշկական տեխնիկային պակաս։


Հասարակական դիտորդական խմբի դիտորդ Արայիկ Զայլյանy հայտնեց, որ «Վանաձոր» քրեակատարողական հիմնարկը բժիշկ չունի, և պատճառաբանությունն այն է, որ որևէ բժիշկ չի ցանկանում այնտեղ աշխատել: