Գուսան Հայկազունը առողջական լուրջ խնդիր ունի. նրան զորակցելու կոչ են անում գեներալներ և երգիչներ (տեսանյութ)
Գեներալ-մայոր Աստվածատուր Պետրոսյանը, Արկադի Տեր-Թադևոսյանը, երգիչ Մրոն այսօր հրավիրված մամուլի ասուլիսին տեղեկացրեցին, որ վատացել է բազմաթիվ հայրենասիրական երգերի հեղինակ Գուսան Հայկազունի առողջական վիճակը և նրան օգնություն է պետք:
«Գիտենք, որ առաջին ճակատում գտնվող զինվորների համար որքան կարևոր են հայրենասիրական երկերը, ոգին: Ոգեղեն երգը փոխարինում է փամփուշտին: Դա սրտի և ոգու կանչն է, որը մղում է մարդուն սխրանքների:
Այսօր մեր ասելիքի բուն իմաստն այն է, որ շատ մարդիկ են գնացել մեր շարքերից, այդ թվում նաև երգիչներ: Այսօր առողջական մեծ խնդիր ունի Գուսան Հայկազունը, ում երգերը մեզ տարել է մարտի: Մենք պետք է օգնենք նրան բուժման համար»,-ասաց Աստվածատուր Պետրոսյանը և ավելացրեց. «Ես հիմա ոչ միայն կոչ եմ անում կամ խնդրում, այլ ասում, որ մենք կարող ենք դա անել, դա մեր ձեռքում է»:
Երգիչ Արսեն Գրիգորյանն էլ նշեց, որ դա օգնություն չէ. յուրաքանչյուրի պարտականությունն է Գուսան Հայկազունի կողքին կանգնելը. «Ինքն անփոխարինելի զինվոր է: Միայն «Հայեր միացե՛ք» երգը մեզ բոլորիս համախմբեց, և այսօր մենք պետք է համախմբվենք և կանգնենք մեր գուսանի կողքին»:
Նախատեսվում է նաև բարեգործական համերգ անցկացնել «Ապրիր առողջ, Գուսան Հայկազուն» խորագրով: Գուսանի համար Անելիք բանկում հաշվեհամար է բացվել, ցանկացողները կարող են իրենց աջակցությունը ցուցաբերել:
Ասուլիսից հետո կենդանի կատարմամբ հնչեցին Գուսան Հայկազունի երգերից:










