Չինաստանում 25 ուղևոր ձերբակալվել է՝ օդանավն ինքնակամ լքելու փորձի համար
Չինաստանի Կունմին քաղաքում China Eastern Airlines ավիաընկերության MU2036 չվերթի մոտ 25 ուղևորներ ձերբակալվել են, երբ ինքնուրույն բացել են օդանավի վթարային ելքերի դռները և փորձել են լքել օդանավը, գրում է lenta.ru-ն։
Նշվում է, որ ուղևորները մի քանի ժամ անցկացրել են օդանավում, քանի որ դեպի Պեկին թռիչքը հետաձգվել է առատ ձյան տեղումների պատճառով։
Սկզբում ուղևորները սպասել են, որ օդանավակայանի աշխատակիցները մշակեն օդանավը հակասառեցման հեղուկով, որից հետո սպասել են թռիչքուղու մաքրման աշխատանքների ավարտին։
Ուղևորների մի մասի համբերությունը հատել է և չնայած անձնակազմի պնդումներին, նրանք բացել են վթարային ելքերի դռները՝ փորձելով դուրս գալ և վերադառնալ օդանավակայան։
Ընդ որում, նշվում է, որ այդ պահին օդանավն արդեն պատրաստ է եղել թռիչքին։ Արդյունքում օդանավը վերադարձրել են դեպի տերմինալ, և մի քանի ուղևորներ ձերբակալվել են ու տեղափոխվել ոստիկանություն։ Մյուս ուղևորները մեկ այլ չվերթով ուղևորվել են Պեկին։










