ԱՄՆ–ն և Բրիտանիան մտավախություն ունեն, որ ԵՄ–ում նոր ահաբեկչություններ կլինեն
Եվրոպայում կարող են տեղի ունենալ նոր ահաբեկչական ակտեր, գրում է ТАСС-ը՝ հղում անելով գերմանական Bild am Sonntag թերթին, որն էլ իր հերթին վկայակոչում է ԱՄՆ-ի և Մեծ Բրիտանիայի հատուկ ծառայությունների իր աղբյուրներին:
Թերթը պնդում է, որ ամերիկյան հատուկ ծառայությունները կարողացել են գաղտնալսել «Իսլամական պետություն» խմբավորման ներկայացուցիչների հեռախոսազրույցը:
Հեռախոսազրույցում ծայրահեղականները խոսել են այն մասին, որ Ֆրանսիայում այս շաբաթ տեղի ունեցած իրադարձությունները «Եվրոպայում ահաբեկչության ալիքի սկիզբ են միայն»:
Ինչպես գրում է Bild am Sonntag-ը, հեռախոսազրույցից հայտնի է դարձել նաև, որ իսլամիստները կարող են Եվրոպա մտնել որպես փախստական ներկայանալով:
Բրիտանական հետախուզությունն իր կողմից զգուշացրել է եվրոպացի գործընկերներին օդային տրանսպորտում ահաբեկչություն իրականացնելու վտանգի մասին, նշում է թերթը:
Այդ առիթով կոնկրետ տեղեկություններ եվրոպական հատուկ ծառայությունները չունեն, նշում է թերթը:










