Պետերբուրգյան ահաբեկչության պատասխանատվությունն ստանձնել է իսլամիստական խմբավորումը

22:46 • 25.04.17

Սանկտ Պետերբուրգի մետրոյում ապրիլի սկզբին տեղի ունեցած պայթյունի պատասխանատվությունն ստանձնել է «Իմամ Շամիլի գումարտակ» նախկինում անհայտ խմբավորումը: 

Ինչպես փոխանցում է BBC-ն, տեղեկությունն այն մասին, որ այդ խմբավորումն է ստանձնել պայթյունի պատասխանատվութունը, հայտնվել է իսլամիստական ռեսուրսների մոնիթորինգ իրականացնող SITE կազմակերպության կայքում: 

Ինչպես հաղորդում է աղբյուրը, խմբավորումը տեղեկացրել է «Ալ-Կաիդա» ահաբեկչական ցանցի կառույցների հետ առնչություն ունենալու մասին` սպառնալով նոր հարձակումներ իրականացնել Ռուսաստանի խաղաղ բնակչության դեմ: 

Հիշեցնենք, որ անցյալ շաբաթ ձերբակալվել էին ահաբեկչության կազմակերպման մեջ կասկածվող եղբայրները, որոնք ֆինանսավորում էին ստացել Թուրքիայից: Ապրիլի 3-ին տեղի ունեցած ահաբեկչությանը 14 մարդ է զոհ գնացել: