Եկել ենք մեր թիմով ձեր վստահության քվեն խնդրելու, որ շարունակենք մեր աշխատանքը. Տարոն Մարգարյանը՝ Շենգավիթում (տեսանյութ)

20:55 • 25.04.17

Երևանի ավագանու ընտրություններին Հայաստանի Հանրապետական կուսակցության քաղաքապետի թեկնածու Տարոն Մարգարյանը նախընտրական քարոզարշավով այսօր Շենգավիթ վարչական շրջանում էր:

Իր ելույթում գործող քաղաքապետը նշեց, որ անցած 4 տարիների ընթացքում ներկայացրել են լավ ծրագիր, և այսօր տեսանելի է, թե ինչ ծավալի աշխատանք է կատարվել Երևանում:

«Բայց դա չի նշանակում, որ խնդիրներ չկան, բազում անելիքներ կան, որոնք պետք է միասին լուծենք և համոզված եղեք՝ այդ խնդիրների լուծումը միասին կստանանք»,-ասաց նա:

Տարոն Մարգարյանը նշեց, թե մեծ քաղաքաշինական ծրագրեր են իրականացրել և առանձնացրեց Լենինգրադյան-Իսակով ճանապարհի կառուցումը, որն ըստ նրա՝ անկախ տարիներին Երևան քաղաքում կառուցված ամենախոշոր ճանապարհն է:

Նա շարունակեց, որ նախորդ տարի հանձնվել է Շենգավիթ վարչական շրջանի Երևան քաղաքի մուտքը, վերգետնյա անցումներ են կառուցվել, 4-րդ կարգի վթարային շենքերից 650 քաղաքացիներ տեղափոխվել են նոր բնակարաններ:

«Բայց մենք եկել ենք մեր թիմով՝ ձեր վստահության քվեն խնդրելու, թույլ տալու, որ շարունակենք մեր աշխատանքը, իրականացնելու Երևան քաղաքի մեր հնգամյա զարգացման ծրագիրը»,-ասաց նա:

Մանրամասները՝ տեսանյութում։