Ռուսական ինքնաթիռը դիտորդական թռիչք է իրականացրել ԱՄՆ Սպիտակ տան և Կոնգրեսի շուրջը
Ռուսաստանի Դաշնության Օդային-տիեզերական ուժերի ինքնաթիռը չորեքշաբթի դիտորդական թռիչք է իրականացրել Վաշինգտոնի կենտրոնում և ԱՄՆ-ի մայրաքաղաքի ողջ շրջակայքում: Ինքնաթիռը մասնավորապես, թռչել է Պենտագոնի, ԱՄՆ-ի Կոնգրեսի և Սպիտակ տան վրայով: Այս մասին զեկուցվել է ավելի ուշ CNN-ի կողմից՝ հղում անելով երկու անանուն աղբյուրների, որոնք ծանոթ էին թռիչքի երթուղուն:
Թռիչքը կատարվել է Բաց երկնքի մասին պայմանագրի շրջանակներում, հայտնում են լրատվամիջոցները:
Ռուսական ինքնաթիռը, ըստ լուրերի, թռչել է նաև Նյու Ջերսիի վրայով, որտեղ այս օրերին իր արձակուրդն է անցկացնում ԱՄՆ նախագահ Դոնալդ Թրամփը: Tu-154M ինքնաթիռն, ըստ ամերիկյան աղբյուրների, թռչել է նաև դեպի Մերիլենդ նահանգում գտնվող ամերիկյան առաջնորդների նստավայրը Քեմփ Դևիդում, Ինչպես նաև Օհայո և Վիրջինիա նահանգներում գտնվող ռազմական բազաներ:
Ինչպես հայտնել են ԱՄՆ Պետքարտուղարությունից, ռուսական ինքնաթիռի տվյալ երթուղին լիովին համաձայնեցված է եղել Մոսկվայի և Վաշինգտոնի միջև:










