Հայ համայնքն էլ, ինչպես Ֆրանսիայում ապրողների մեծամասնությունը, Էմանուել Մակրոնից դժգոհության առիթներ կունենա․ Արթուր Խանջյան

22:48 • 14.08.17

Ֆրանսիայի Իսե լե Մուլինիոյի փոխքաղաքապետ Արթուր Խանջյանի խոսքով՝ Ֆրանսիայի նախագահ Էմանուել Մակրոնը, անփորձ քաղաքական գործիչ լինելով, իր շուրջն անփորձ մարդկանց  համախմբեց, և բնական էր, որ դրա հետևանքով նրա շուրջ դժգոհություն կլինեին, մարդկանց սպասումները չէին արդարանա:

«Ժողովուրդը սպասում էր, որ փորձառու, քաղաքական դիմագիծ ունեցող անհատը կղեկավարի երկիրը: Իսկ Մակրոնը որևէ քաղաքական կուսակցության  անդամ չի եղել, իր շուրջն էլ անփորձ մարդկանց է հավաքել: Անփորձ բանակ է, անփորձ գեներալով»,- նկատեց նա։

Արթուր Խանջյանը նշեց, որ օր օրի Էմանուել Մակրոնի շուրջ դժգոհությունն ավելի կմեծանա: Նա նկատեց, որ ժամանակակից մարդը այլևս շատ համբերություն չունի՝ երկար սպասելու համար փոփոխություններին:

Ֆրանսահայ գործիչը, անդրադառնալով հայ համայնքի՝ Մակրոնից սպասումներին, նկատեց, որ կարծես թե ֆրանսահայության մեծամասնությունը նախագահական ընտրությունների առաջին փուլում քվեարկել էր Ֆրանսուա Ֆիյոնի օգտին, Մակրոնին չէր ընտրել:

«Մակրոնը հայերին երբեք մոտ չի եղել, բնական է, քանի որ մարդը քաղաքականությամբ չէր զբաղվել: Ապրիլի 24-ին է եղել Կոմիտասի արձանի մոտ, և չեմ հիշում, որ նա հայերին մի հայտարարություն արել, խոստում տվել է, միայն CCAF-ն է ինչ-որ հայտարարություն արել,- ասաց նա՝ նշելով, որ սակայն, ի տարբերություն մյուս թեկնածուների, արդեն ընտրված Մակրոնը իր կուսակցությունում հայազգի պատգամավորների է ներգրավվել,- գուցե նրանց միջոցով էլ հայկական հարցերին ծանոթանա»:

Արթուր Խանջյանի կանխատեսմամբ՝ հայ համայնքն էլ, ինչպես Ֆրանսիայում ապրողների մեծամասնությունը, Էմանուել Մակրոնից դժգոհության առիթներ կունենա: «Եթե Ցեղասպանության մասին օրինագիծը չանցնի, հայ համայնքի դժգոհությունը կմեծանա: Եվ պետք է նշենք, որ հայ համայնքը Ֆրանսիայի մաս կազմող ժողովրդի մի մասն է: Եթե վտանգավոր հարցերը շատանան, անվտանգության խնդիրներ լինեն, տնտեսական կյանքը վատթարանա, ինչպես ցանկացած ֆրանսիացի, ֆրանսահայը ևս դժգոհություն հայտնելու է»,- ասաց նա:

Նրա խոսքով՝ ֆրանսահայությունը Մակրոնից սպասումներ ունի նաև Ղարաբաղյան հիմնախնդրի կարգավորման գործընթացն առաջ տանելու հետ կապված: Սակայն, ըստ նրա, Մակրոնը, չնայած սահմանում եղած լարվածությանը, հիմնախնդրով լուրջ չի զբաղվում․ հպանցիկ, մեղմ քաղաքականություն է վարում: «Շատ անփորձ է նա՝ Թրամփի նման: Շատ դժվար օրեր են սպասվում Մակրոնի կառավարման շրջանում: Ժողովրդի սպասումները Մակրոնից ավելին են, քան նրա կարողությունները»,- ասաց նա: