Կատալոնական Կամբրիլսի ահաբեկիչների կրած մահապարտի գոտիները կեղծ են եղել

13:11 • 18.08.17

Կատալոնական Կամբրիլս զբոսաշրջային քաղաքում սպանված ահաբեկիչների կրած մահապարտի գոտիները կեղծ են եղել, հայտնել է Կատալոնիայի ներքին գործերի նախարարի խորհրդական Խոակին Ֆորնը:

Ինչպես նշում է ria.ru-ն, պաշտոնյան ասել է, որ այդ գոտիները չէին կարող պայթել, քանի որ պայթուցիկներն իսկական չեն եղել:

Պաշտոնյան հաստատել է, որ Audi մեքենան վրաեթի է ենթարկել ոստիկանների խմբին, ինչից հետո նրանց միջև փոխհրաձգություն է սկսվել: 

Ինչպես ավելի վաղ հայտնել էր Tert.am-ը, օգոստոսի 17-ին Բարսելոնայի մարդաշատ փողոցներից մեկում միկրոավտոբուստը վրաերթի է ենթարկել հետիոտների ամբոխին՝  խլելով 13 մարդու կյանք: Ավելի ուշ քաղաքի մեկ այլ հատվածում մեքենան վրաերթի է ենթարկել ոստիկաններին: Ենթադրվում է, որ տվյալ հարձակումն առնչություն ունի Բարսելոնայի կենտրոնում տեղի ունեցած ահաբեկչության հետ։ 

Բացի այդ, նույն օրը՝ օգոստոսի 17-ին, կատալոնական Ալկանար քաղաքում որոտացել է 2 պայթյուն, ինչի հետևանքով տուժել են ոստիկաններ:

Ավելի ուշ Բարսելոնայից դեպի հարավ ընկած Կամբրիլս քաղաքում ահաբեկիչների ևս մի խումբ փորձել է կրկնել Բարսելոնայի ահաբեկչությունը՝ ֆուրգոնով վրաերթի ենթարկելով մարդկանց: Նրանց գործողությունների հետևանքով տուժել է 6 մարդ, մինչդեռ 5 հարձակվողները սպանվել են:

Ոստիկանությունը ենթադրում է, որ կատարված բոլոր հարձակումները փոխկապակցված են: