Հս. Կորեան ցուցադրել է՝ ինչպիսին կլիներ ամերիկյան Գուամ կղզու ուղղությամբ հրթիռային հարվածը (տեսանյութ)
Հյուսիսային Կորեայի իշխանությունները քարոզչական տեսանյութ են հրապարակել, որում ցուցադրվում է, թե ինչպիսին կլիներ ամերիկյան Գուամ կղզու ուղղությամբ հրթիռային հարվածը: Այդ մասին հայտնում է Yonhap գործակալությունը:
«Ամերիկացիները պետք է ապրեն՝ մշտապես զգոն լինելով: «Հվասոն-12» հրթիռները կտանջեն նրանց օր ու գիշեր, քանի որ արձակման ժամանակը հայտնի չէ: Ամերիկացիները կդողան»,- ասված է տեսահոլովակի նկարագրությունում:
Երբ կադրում ցուցադրվում է ԱՄՆ ռազմական գերատեսչության ղեկավար Ջեյմս Մեթիսի լուսանկարը, տեքստում նշվում է. «Մենք հուսով ենք, որ ամերիկացի քաղաքական գործիչները երկու անգամ կմտածեն հնարավոր պատերազմի հետևանքների մասին»:
Ավելի վաղ հաղորդվել է, որ Միացյալ Նահանգներն ու Հարավային Կորեան «Ըլչի-Ֆրիդոմ գարդիան» անվամբ համատեղ տասնօրյա զորավարժություններ են սկսում: Չնայած ԱՄՆ-ն և Հարավային Կորեան պնդում են, որ զորավարժությունները պաշտպանական բնույթ են կրում, ԿԺԴՀ-ն դատապարտել է դրանց անցկացումը՝ նախազգուշացնելով, որ դրանք կարող են հանգեցնել աղետալի հետևանքների: Փհենյանում վստահ են, որ զորավարժությունների նպատակը Հյուսիսային Կորեայի տարածք ներխուժման նախապատրաստումն է:
Կորեայի կենտրոնական հեռագրային գործակալությունն ավելի վաղ հայտարարել էր, որ Փհենյանն ուսումնասիրում է ցանկացած պահի գործողության միջին և մեծ շառավղով «Հվասոն -12» հրթիռներով Գուամ կղզում Միացյալ Նահանգների ռազմաբազաներին հարվածելու վերաբերյալ ծրագիրը: Սրան ի պատասխան ԱՄՆ նախագահ Դոնալդ Թրամփն ասել էր, որ Գուամին հարվածելու դեպքում, ԱՄՆ-ն Հյուսիսային Կորեայի հետ այնպիսի բան կանի, որ նախկինում ոչ ոք չէր տեսել:
Այնուհանդերձ՝ վերջին շրջանում 2 պետությունների ղեկավարները նախընտրել են մի կողմ դնել ռազմաշունչ հայտարարությունները: Մասնավորապես՝ Կիմ Չեն Ընն ասել է, որ պատրաստ է միառժամանակ հետաձգել Գուամին հարվածելու որոշման իրականացումն ու տեսնել, թե ԱՄՆ-ն իրեն ինչպես կդրսևորի, իսկ Թրամփը հավանություն է տվել այս որոշմանը:










