ՌԴ ԱԳՆ-ն Բոսնիա և Հերցեգովինայի դեսպանատանն է փոխանցել Լավրովին որպես նվեր մատուցված և սկանդալի առիթ դարձած 300-ամյա սրբապատկերը

09:43 • 24.12.20

Ռուսական կողմը Մոսկվայում Բոսնիա և Հերցեգովինայի դեսպանատանն է հանձնել 18-րդ դարի սրբապատկեր, որը նվիրել էին ՌԴ արտգործնախարար Սերգեյ Լավրովին, հայտնում է ՏԱՍՍ-ը՝ հղում անելով ՌԴ ԱԳՆ-ին:

Գերատեսչությունից այս առնչությամբ մանրամասնել են, որ սրբապատկերը դեկտեմբերի 23-ին փոխանցվել է Բոսնիա և Հերցեգովինայի դիվանագիտական առաքելությանը:

«Միևնույն ժամանակ, գործընկերներին առաջարկվել է օգտագործել առկա իրավական մեխանիզմները` պարզելու համար այս գործի բոլոր հանգամանքները, ներառյալ նշված արտեֆակտի ծագումը»,- նշվում է հաղորդագրությունում:

Ինչպես ավելի վաղ տեղեկացրել էր Tert.am-ը՝  օրերս Բոսնիա և Հերցեգովինայի նախագահության անդամ Միլորադ Դոդիկը Լավրովին 300-ամյա ուղղափառ սրբապատկեր էր նվիրել: Դրանից հետո Ուկրաինայի դեսպանատունը նոտա է հղել Բոսնիա և Հերցեգովինայի արտաքին գործերի նախարարությունը՝ պահանջելով այդ սրբապատկերը վերադարձնել Ուկրաինային:

Նշենք՝ Բոսնիա և Հերցեգովինայի դատախազությունը գործ է հարուցել և նախաձեռնել է արտեֆակտի ծագման ստուգումը: