Առատ տեղումների պատճառով փակ են Ստեփանծմինդա-Լարս, Նինոծմինդա-Բավրա ավտոճանապարհները

19:17 • 07.01.15

ՀՀ տրանսպորտի և կապի նախարարությունը տեղեկացնում է, որ հունվարի 7-ին` ժամը 19:00-ի դրությամբ, գետնաբքի և վատ տեսանելիության պատճառով դժվարանցանելի են Ապարան-Արագած, Արթիկ-Արագած, Սևան-Դիլիջան ճանապարհահատվածները:

 

Ճանապարհաշինարարների կողմից կատարված մաքրման և մշակման աշխատանքներից հետո Վարդենյաց լեռնանցքը երկկողմանի բաց է, սակայն ուժեղ բքի պատճառով այն դեռևս դժվարանցանելի է:

 

Նախարարությունը վարորդներին խորհուրդ է տալիս ժամը 20:00-08:00-ն ընկած ժամանակահատվածում չօգտվել այդ ճանապարհահատվածից:

 

Ախուրյանի, Սևանի, Ապարանի, Գյումրու, Արթիկի, Գավառի, Մարտունու ճանապարհներին տեղ-տեղ մերկասառույց է:

 

Մարալիկում, Արթիկում, Աշոցքում, Ապարանում, Արագածում, Սևանում քամի է, իսկ Մեղրիում տեղում է ձյուն:

 

Անվտանգ երթևեկությունն ապահովելու նպատակով ավտոճանապարհներին կատարվում են աղով, ավազով մշակման և մաքրման աշխատանքներ:

 

Վրաստանի ենթակառուցվածքների նախարարության ճանապարհային դեպարտամենտից ՀՀ տրանսպորտի և կապի նախարարությանը տրամադրած տեղեկատվության համաձայն՝ առատ տեղումների պատճառով բոլոր տեսակի տրանսպորտային միջոցների համար փակ են Ստեփանծմինդա-Լարս, Նինոծմինդա-Բավրա ավտոճանապարհները: