Լավ է, որ հայերը ճոխ Ամանոր են նշում. մշակութային մարդաբան

18:40 • 08.01.15

Լավ է, որ մեր աղքատ հասարակության հիմնական մասը գոնե Ամանորին պահպանում է ավանդույթը և մի քանի օրով թոթափում է աղքատությունը: Tert.am -ի հետ զրույցում նման կարծիք հայտնեց մշակութային մարդաբան Աղասի Թադևոսյանը՝ ի պատասխան հարցի, թե մեր ժողովուրդը համարժեք գնահատական տալի՞ս է իր նյութական, ինչու ոչ՝  բարոյահոգեբանական  վիճակին՝ Նոր տարվա սեղանին դնելով այդքան գումար, եռանդ ու առողջություն:

 

«Նոր տարին տոն է, որը տոնում են  այնպես,  ինչպես ընդունված է : Դա  շատ նորմալ է: Ես չեմ համարում, որ մեր ժողովրդի ՝  տոն ունենալու ցանկությունը դատապարտելի է. մարդիկ տարվա մեջ մի անգամ ցանկանում  են սեղան գցեն, ուրախանան:  Խնդիրն այն չէ, որ մարդիկ ուզում են սեղան գցել, խնդիրն այն է, որ մենք այն աստիճանի վայրէջք ենք ունեցել , որ վերածվել ենք աղքատագույն  հասարակության, և հիմա մտածում ենք, որ ժողովուրդն էլ պետք է այդ աղքատագույնի մակարդակի իջեցնի իր տոնակատարության աստիճանը: Ես , հակառակը, գտնում եմ, որ շատ էլ լավ են անում մարդիկ, որ գոնե այս մի բանը կարողանում են պահպանել, չեն վերածվում աղքատների  գոնե Նոր տարվա տոնակատարության շրջանում»:

 

Աղասի Թադևոսյանի մեկնաբանությամբ ՝  երկրի 80 տոկոսը աղքատ է, սակայն նա չի կարծում, թե մարդիկ սթրես են ապրում ամանորյա ծախսերով: