Եղանակն՝ այսօր
Անկարայում ԱՄՆ դեսպանը մեկնաբանել է քրդերի տարբերանշանով ամերիկացի զինծառայողների սկանդալային լուսանկարը (լուսանկար)
Անկարայում ԱՄՆ դեսպան Ջոն Բասը մեկնաբանել է Սիրիայում ամերիկացի զինծառայողների լուսանկարը, որում նրանք Սիրիայի քրդերի տարբերանշանով հագուստ են կրում, տեղեկացնում է «Հուրրիյեթ» թերթի կայքը։
«Դա մեր քաղաքականությունը չի արտացոլում»,-ասել է դեսպանը։
Նա նաև նշել է, որ իրենք Քուրդիստանի աշխատավորական կուսակցությանը՝ PKK-ին, կոչ են անում վայր դնել զենքերն ու բանակցել թուրքական իշխանությունների հետ։
Ջոն Բասը նշել է, որ Սիրիայում ամերիկացի զինվորականները խորհրդատվական առաքելություն են իրականացնում քրդերի համար, և տարբերանշանով համազգեստը ոչ թե պետության քաղաքականությունն է, այլ այդ զինծառայողների անձնական քայլը։
«Մերձավոր Արևելքում բախումների մթնոլորտը շարունակվում է արդեն երկար տարիներ։ Այդ բռնությունը պետք է դադարեցվի։ Դրա համար ամենաառաջին ու կարևոր քայլը կլինի PKK-ի կողմից զենքերը վայր դնելը»,- ասել է նա։
Հիշեցնենք, որ պաշտոնական Անկարային զայրացրել էր քրդերի տարբերանշանով ամերիկացի զինծառայողների լուսանկարը։
Թուրքիայի արտգործնախարար Մևլութ Չավուշօղլուն ամերիկացիներին «երկերեսանի» էր անվանել և քննադատել էր քրդերին աջակցելու հարցում Վաշինգտոնի քաղաքականությունը։
Studio One