Եղանակն՝ այսօր
Ցավալի, մտահոգիչ, «ներքին գործ». տարբեր պաշտոնյաներ մեկնաբանել են բրիտանացիների հանրաքվեի արդյունքները
Շվեդիայի վարչապետ Ստեֆան Լյովենը մեկնաբանել է երեկ Մեծ Բրիտանիայում կայացած հանրաքվեի արդյունքները, որի ընթացքում բրիտանացիների մեծ մասը կողմ է արտահայտվել ԵՄ-ից երկրի դուրս գալուն:
«Եվրոպան լուրջ վտանգի առաջ է կանգնած՝ տնտեսության, միգրացիայի, կլիմայի ու անվտանգության տեսանկյունից»,-ասել է Լյովենը Ստոկհոլմում լրագրողների հետ զրույցում:
Շվեդիայի վարչապետը հայտարարել է, որ հանրաքվեի արդյունքները վկայում են ԵՄ-ն որպես բոլոր քաղաքացիների միություն զարգացնելու անհրաժեշտության մասին, այդ թվում՝ փախստականների համար։
«Մենք հարգում ենք, իհարկե, բրիտանացիների որոշումը, սակայն դա լուրջ իրադրություն է ստեղծում նախ Մեծ Բրիտանիայի համար»,-ասել է նա:
Լյուքսեմբուրգի վարչապետ Քսավյե Բեթելը ցավում է ԵՄ-ից դուրս գալու բրիտանացիների որոշման համար: Այդ մասին նա գրառում է արել Twitter-ի իր միկրոբլոգում:
«Ես հարգում եմ, բայց ցավում եմ Brexit-ի արդյունքների համար: Լյուքսեմբուրգը կշարունակի աշխատել Եվրամիության ամրապնդման ուղղությամբ»,-գրել է վարչապետը:
Թեմային անդրադարձել է ՌԴ արտգործնախարար Սերգեյ Լավրովը: Նա հանրաքվեի արդյունքները Բրիտանիայի ներքին գործն է համարել:
«Դա անգլիացի ժողովրդի ներքին գործն է»,-ասել է նա:
Անդրադառնալով Մեծ Բրիտանիայի արտգործնախարարի հայտարարությունը մեկնաբանելու խնդրանքին՝ այն մասին, որ հանրաքվեի արդյունքներն ուրախացրել են ռուսական իշխանություններին, Լավրովը նշել է, թե ինքը բժշկական կրթություն չունի:
«Այդ պատճառով էլ բժշկական դեպքերը մեկնաբանել չեմ կարող»,-ասել է Լավրովը:
Studio One