«Կորպորատիվ միջոցառումների ժամանակ չունեմ այն պահանջարկը, որն ունի, օրինակ, Սպիտակցի Հայկոն, բայց ես էլ իմ չափով եմ պահանջված»». Նարեկ Պետրոսյանը` նոր հոլովակի և «Հորանց տունը» սիթքոմում դերի մասին

Ռեփեր Նարեկ Պետրոսյանն օրեր առաջ ներկայացրեց իր նոր` «Ոտերիս տակ» երգի տեսահոլովակը: Tert.am Life-ի հետ զրույցում Նարեկն ասաց, որ երգի խոսքերի, երաժշտության ու գործիքավորման հեղինակն ինքն է:

«Տեսահոլովակը ռեժիսոր, որպես այդպիսին, չունի, քանի որ նկարահանվել է մեկ կադրով, առանց մոնտաժի: Ունեմ նաև այլ երգեր, որոնց հիման վրա պատրաստվում եմ հոլովակներ նկարահանել: Կարծում եմ` ամռան ընթացքում նորություններ կունենամ»,- ասաց նա:

Հարցին` ինչքանո՞վ է իր մատուցած երաժշտությունը պահանջված կորպորատիվ միջոցառումների ժամանակ, Նարեկը պատասխանեց. «Ես ունեմ կոմերցիոն երգեր: Երևի, հայկական հիփ-հոփ ժանրի միակ կատարողն եմ, ով ունի ալտերնատիվ երգադարան: Կորպորատիվ միջոցառումների ժամանակ չունեմ այն պահանջարկը, որն ունի, օրինակ, Սպիտակցի Հայկոն, բայց չեմ բողոքում, ես էլ իմ չափով եմ պահանջված»:

Նարեկն այս շրջանում նկարահանվում է նաև «Հորանց տունը» սիթքոմում: Նրա խոսքով` նախագծի պրոդյուսերների կողմից նկարահանվելու առաջարկը միանգամից է ընդունել։ «Շատ հետաքրքիր նախագիծ է: Իմ կերպարն ԱՄՆ-ից ժամանած տղա է, ով եկել է հոր ծննդյան օրը նշելու: Նրա տարեդարձից հետո կերպարս չի կարողանում վերադառնալ ԱՄՆ, քանի որ հայտարարվում է արտակարգ դրություն ու փակվում են բոլոր սահմանները: Հեռուստադիտողին հետաքրքրքիր զարգացումներ են սպասվում»,-խոստացավ նա:



Մարիամ Խաչատրյան