«Սա իմ կամքն է, հոգու և սրտի պարտքը». Սոնայի մենահամերգը՝ նվիրված Արցախյան պատերազմում զոհված զինվորներին

1991 թվականից մինչև մեր օրերի երգեր. տևական դադարից հետո երգչուհի Սոնան «Քո հրեշտակը» խորագրով մենահամերգ ունեցավ, որը նվիրված էր Արցախյան պատերազմում հերոսաբար զոհված զինվորների հիշատակին: Հանդիսատեսի շարքերում ներկա էին միայն հրավիրատոմսերով եկած մարդիկ՝ Արցախյան երկրորդ և Ապրիլյան պատերազմում զոհված զինվորների ընտանիքներ, վիրավորում ստացած զինվորներ: Ներկա էին դերասան Հայկ Չոմոյանը, ով Արցախյան պատերազմում ոտքերի շրջանում վիրավորում էր ստացել, երգիչ Արթուր Խաչենցը, ով մասնակցել էր Ապրիլյան և Արցախյան երկրորդ պատերազմներին:

Tert.am Life-ը ներկա է եղել Սոնայի մենահամերգին և ֆիքսել երեկոյի հիշարժան դրվագները:

«Սա իմ կամքն է, հոգու և սրտի պարտքը. Աստված ինձ տաղանդ է տվել, որը ես պետք է կիսեմ: Սա ստանդարտ համերգ, այլ զգացմունքային առումով տարբերվող է»,- համերգից առաջ ասաց Սոնան, ապա հավելեց,– Ոչ մի տոմս չի վաճառվել, եղել են միայն հրավիրատոմսեր: Սկզբում մտածում էի՝ զոհված զինվորների ընտանիքի անդամներին հրավիրել պետք չէ, բայց զանգել և ասել էին՝ ուզում ենք գալ Սոնայի համերգին»:

Տևական դադարից հետո սա Սոնայի առաջին մենահամերգն էր, երգչուհին ընդգծեց, որ այն հենց բարեգործական բնույթ պետք է կրեր:

«Այս տարի իմ ստեղծագործական գործունեության 30-ամյակն է, նախատեսում էինք համերգներ ունենալ Հայաստանում, Մոսկվայում, Արցախում, բայց... Այդ ամենից հետո համարում եմ, որ այս տարին բարեգործական համերգով պետք է սկսեի: Հիմա հայի ոգին պահպանելը շատ կարևոր է»,- ասաց նա:

Համերգի ընթացքում Սոնան կատարեց մոտ 30 երգ, նրան ձայնակցում էին բեքվոկալիստներ Տյոմը, Անահիտ Շահբազյանն ու Անահիտ Պետրոսյանը:

Լուսանկարները՝ Հրանտ Մարինոսյանի