«Մեր ոլորտում չկա մի աղջիկ, որն ընկերական կապեր չունի». Տաթև Սարգսյանի պատասխանն իրեն անբարոյական համարողներին

Դերասանուհի Տաթև Սարգսյանը վերջին շրջանում անընդհատ քննադատությունների կիզակետում է։ Նախ` նրան մեղադրեցին վատ ընկերուհի լինելու, ապա ինքափիառով զբաղվելու համար, այսօր արդեն էլեկտրոնային մամուլում հրապարակում հայտնվեց նրա բարոյականության մասին` «45-ամյա կինն իր փորձով գլուխը պատովն է տվել 24-ամյա Տաթև Սարգսյանի սիրային կապերի համեմատ» վերտառությամբ։ Ըստ այդմ` նա ժամանակին սիրավեպ է ունեցել Ռիչարդ Մադլենյանի, Դավիթ Մարդյանի, Նիկոլայ Եղիազարյանի, Ռաֆայել Երանոսյանի հետ։ Անդրադարձ էր եղել նաև Տաթևի նշանադրությանը և ամուսնությունից առաջ այն չեղյալ համարելուն։

Tert.am Life–ի հետ զրույցում Տաթևն ասաց, որ վերոնշյալ տղաների հետ հարաբերությունների մասին վաղուց է խոսել։ «Ռիչարդին, առհասարակ, չգիտեմ` ինչպե՞ս կարելի էր անդրադառնալ, որովհետև այն ժամանակաշրջանում, երբ մենք  ծանոթ էինք, նա հարաբերություններ ուներ Լիկա Սալմանյանի հետ։ Գոնե պետք է փորձել մի քիչ ադեկվատ լինել, մեկնաբանությունների մեջ պետք է զգույշ լինել, որովհետև կողքից շատ ծիծաղելի է, երբ 2 նախադասության մեջ շատ թերություններ ես գտնում»,– ասաց նա։

Տաթևը նշեց, որ միշտ էլ ունեցել է տղա ընկերներ, և դա նորմալ երևույթ է։ «Մեր ոլորտում չկա մի աղջիկ, որն ընդհանրապես ընկերական կապեր չունի, որպես ընկեր`տղա հասկացողություն չկա իր կյանքում։ Եթե այդ ամենն  անդրադառնում է բարոյականության վրա, իսկապես ինչ–որ բան կյանքում սխալ եմ ընկալում, պետք է վերանայեմ ինձ և հեղափոխություն անեմ իմ տեսակի մեջ։ 6 տարի է` աշխատում եմ այս ոլորտում, ունեմ բազմաթիվ ընկերներ։ Չգիտեմ` հիասթափեցնում եմ, թե ոչ, սակայն թե՛ մեր, թե՛ այլ ոլորտներից կան շատ տղամարդիկ, որոնք ինձ շատ հարազատ են։ Ցավում եմ, որ ինչ–որ մեկի մտածելակերպով, եթե կողքիդ տղամարդ է կանգնած, դա միայն անձնական կապ է ենթադրում»,– ասաց նա։

Անդրադառնալով ամուսնության նախաշեմին իր նշանադրությունը չեղյալ համարելուն` Տաթևը նշեց, որ ինքը ոչ այն ժամանակ է խոսել, ոչ էլ հիմա է մեկնաբանելու պատճառները։ «Երբ չցանկացա խոսել նշանս հետ տալու պատճառների մասին, պատրաստ էի, որ լինելու են նման խոսակցություններ։ Այն մարդիկ, որոնք չգիտեն ճշմարտությունը, իրենց «ճշմարտությունն» են հորինում։ Ինչ վերաբերում է այդ ամենի հաշվին ինքնափիառ անելուն, եթե հանրային մարդու կյանքում նման իրադարձության մասին խոսելը դիտվում է որպես ինքափիառ, թող այդպես ընկալվի։ Միայն հեղինակի մոտ է այդպես ընկալվում, որովհետև 2 տարի առաջ, երբ այդ մասին խոսում էի, մարդկանցից միայն դրական արձագանքներ էի ստանում»,– ասաց նա։

Տաթևը նշեց, որ իր համար անհասկանալի է քննադատությունների այս ալիքը. «Չգիտես ինչու են այդքան լարված խոսակցություններ սկսվել անձիս հետ կապված։ Տարօրինակ է, որովհետև 3 տարի էկրաններին չլինելուս ընթացքում մարդիկ միշտ հետաքրքրվել են` երբ եմ վերադառնալու եթեր, ասել են, որ ինձ կարոտել են, մեկ էլ տեսնում եմ այսպիսի արձագանք»։