«Այնպես էր ուրախացել, աշխարհն իրենն էր». Գրիգոր Դանիելյանի և Հռիփսիմե Ելինյանի նվերը որդու 8–ամյակին

Դերասան Գրիգոր Դանիելյանի և երգչուհի Հռիփսիմե Ելինյանի որդին՝ Ալբերտոն, այսօր տոնում է ծննդյան տարեդարձը։ Նա դառնում է 8 տարեկան։ Tert.am Life–ի հետ զրույցում Հռիփսիմեն պատմեց, որ որոշել էին Բջնիում գտնվող իրենց առանձնատանը խնջույք կազմակերպել փոքրիկի տարեդարձի առթիվ, սակայն Ալբերտոյի զբաղվածությունը թույլ չի տվել։) Բանն այն է, որ նա հիմա նկարահանվում է «Նվագախմբի երեխաները» երաժշտական նոր նախագծում։ Ալբերտոն լիովին ընկղմվել է հեռուստատեսային աշխատանքի մեջ։ Նա հստակ գնում է ծնողների ճանապարհով։

«Մենք շատ էինք ուզում նշել իր ծնունդը, սակայն Ալբերտոն ասաց, որ չի նեղվում, օրը կանցկացնի նկարահանման հրապարակում»,– ասաց Հռիփսիմեն ու հավելեց, որ իրենք Ալբերտոյի ծնունդը նշել են կեսգիշերին, իսկ այսօր նրան ճանապարհել են աշխատանքի։)

«Երբ Ալբերտոն նոր էր ծնվել, շատ խելոք էր։ Չէինք հավատում, որ մեր ընտանիքում երեխա կա։ Դարձավ 1 ամսական ու սկսեց ընդհանարապես չքնել գիշերները։ Շատ չարաճճի էր։ Ալբերտոյին սկսել ենք վայելել 4 տարեկանից, երբ մի քիչ խաղաղվեց,– հիշեց Հռիփսիմեն, ապա նկատեց, որ որդին շատ հանգիստ ու ծնողասեր է,– ամենակարևորը` շնորհակալ երեխա է։ Ամեն ինչի համար ասում է` շնորհակալ եմ, այս տարիքում ասում է` շնորհակալ եմ, որ կաք։ Շատ ուրախ եմ, որ դաստիարակված է, երբևէ մեզ ամոթով չի թողել։ Հոռացած չէ, ինչպես իր տարիքի շատ երեխաներ։ Մենք շատ ենք աշխատում այդ ուղղությամբ, անընդհատ խոսում ենք, որ հանկարծ չփոխվի։ Ինքը շատ լսող է, ուրախ եմ, որ իր պես տղա ունեմ»։

Երգչուհին նշեց, որ ինքը շատ երջանիկ է 2 որդի ունենալու համար։ Չնայած բոլոր անքուն գիշերներին` առաջնեկը մեծ երջանկություն էր բերել իրենց ընտանիքին։ Հիմա, երբ իրենց տանը կրկին փոքրիկ կա, Ալբերտոն ևս շատ երջանիկ է։ «Ասում է` Ռոբերտոն աշխարհի ամենաուժեղ նվերն է։ Գժի պես սիրում է եղբորը։ Ես նման սեր ու հոգատարություն չեմ տեսել այդ տարիքի երեխայի մոտ։ Շատ ուրախ եմ, որ այդպես է վերաբերում եղբորը»,– նշեց մայրիկը։

Այնուամենայնիվ, Ալբերտոն նյութական նվեր էլ է ուղել` սփիներների մի ամբողջ հավաքածու։ «Խելագարվում է սփիներների համար։ Ընտրել է լավագույնները ու նվեր ուզել։ Երբ ստացավ երազած սփիներները, այնպես էր ուրախացել, աշխարհն իրենն էր»,– ասաց Հռիփսիմեն։