«Տարիքից չեմ վախենում». Նարինե Պետրոսյանի տարեդարձի անակնկալն ու երազանքը

Դրամատիկական թատրոնի դերասանուհի Նարինե Պետրոսյանն այսօր նշում է ծննդյան տարեդարձը։ Դերասանուհին բոլորում է 32 տարին, ինչի կապակցությամբ բազմաթիվ շնորհավորանքներ է ստացել։ Tert.am Life–ի հետ զրույցում դերասանուհին նշեց, որ պարուրված է ընտանիքի ու ընկերների սիրով ու ջերմությամբ։

Դերասանուհուն անակնկալ են մատուցել դուստրերը` 9–ամյա Աելիտան ու 6-ամյա Անին։ «Վաղ առավոտյան իրենք ինձ նվիրեցին իրենց պատրաստած ձեռագործ աշխատանքը։ Թղթի վրա մեծ գրել էին` շնորհավոր, գեղեցիկ մաղթանքներ հղել, ժապավեներով կապել։ Շատ հաճելի էր»,– ասաց դերասանուհին, ում կրտսեր դուստրը դեռ 1 տարեկան է և չի հասկանում, որ մայրիկի ծնունդն է։

Ամուսնու շնորհավորանքն ու նվերը բացահայտել Նարինեն չցանկացավ, համարում է, որ դա անձնական է։ Հարցին` ի՞նքն է նախապես հուշում, թե ինչ նվեր է ակնկալում, թե՞  ամուսինն է ընտրություն անում, Նարինեն դժվարացավ միանշանակ պատասխանել։ Ըստ նրա`ամեն անգամ մի կերպ է լինում։ «Ամուսինս ամբողջ տարվա ընթացքում է ինձ ուշադրությամբ  շրջապատում, իսկ դա շատ կարևոր է կնոջ համար»,– նկատեց դերասանուհին։

Տարեդարձի օրը Նարինեն  կնշի ընտանեկան միջավայրում։ Այսօր հատուկ երազանք նա չի մտապահում, սակայն երազել չի դադարում։ Նարինեն նշեց, որ երազում է ներդաշնակության մասին, որպեսզի չկորցնի ներքին խաղաղությունը։

Իր ամենամեծ ձեռքբերումը երիտասարդ մայրիկը համարում է իր ընտանիքն ու աշխատանքային հաջողությունները։ Ընտանիքը, իհարկե, առաջին տեղում է։ Լավ ընտանիք ունենալու համար Նարինեն ունի իր բանաձևը`  լինել անկեղծ։ Իր կյանքի 32 տարիների ընթացքում ամենակարևոր բանը, որ հասկացել է դերասանուհին, սիրով ապրելն է։ «Հասկացել եմ, որ ամենակարևորը սիրով լինելն է։ Պետք է  սիրել կյանքը, գնահատել միմյանց»։

Կյանքի ընթացքում բացթողումներ էլ է ունեցել, դա բնական է, սակայն չի բացահայտում։ Նա կփորձի շտկել դա լուռ։

Ինչ վերաբերում է կանանց շատ հուզող հարցին` տարիքի հետ կապված մտավախություններին Նարինեն այդպիսիք չունի։

«Ես տարիքից ու արտաքինից չեմ վախենում։ Յուրաքանչյուր կին էլ միշտ ուզում է լինել ցանկալի, գրավիչ, սակայն կարծում եմ` շատ ավելի կարևոր է հետաքրքիր լինել։ Միգուցե, տարիքի հետ արտաքինդ ինչ–որ չափով հետին պլան է մղվում, բայց եթե դրա հետ մեկտեղ փորձդ, իմաստությունդ ավելանում են, հոգ չէ։ Կարծես, Սոֆի Լորենն էսպիսի մի խոսք ուներ, որ 20 տարեկանում կարելի է լինել գեղեցիկ, 70–ում` անկրկնելի։ Միգուցե, դեմքիդ 1-2 կնճիռ ավելանա, սակայն որպես անհատականություն` շատ ավելի գրավիչ ու ներկայանալի լինես։ Ես օրինակ էլ ունեմ աչքիս առաջ` դերասանուհի Էվելինա Շահիրյանը, ում յուրաքանչյուր  տարիքում նայում ես, բարի, դրական էներգիա ես ստանում։ Շատ կարևոր է, թե ինչպես ես ապրում կյանքդ»,– եզրափակեց դերասանուհին։