Մարտի 31–ին կկայանա Ազգային երաժշտական մրցանակաբաշխություն. ովքե՞ր են ընտրելու լավագույններին

Մարտի 31–ին Օպերայի և բալետի ազգային ակադեմիական թատրոնում կկայանա «Ծիծեռնակ» ազգային երաժշտական մրցանակաբաշխությունը, որը մրցանակներ կհանձնի դասական, ժողովրդական և փոփ ժանրում լավագույնս ներկայացողներին։ Մրցանակաբաշխությունը ներառում է 25 անվանակարգ։ Կլինեն նաև հատուկ մրցանակներ։ Այս մասին, այսօր հրավիրված մամուլի ասուլիսի ժամանակ հայտնեց ՀՀ Մշակույթի նախարար Արմեն Ամիրյանը։

«Մրցանակաբաշխությունը պետք է ի մի բերի հայ դասական և  ժամանակակից արվեստի լավագույն նմուշները և ամփոփի, թե տարվա ընթացքում ովքեր ինչ հաջողություններ կարողացան արձանագրել։ Մենք համոզված ենք, որ նման մրցանակաբաշխությունը կարող է շատ լավ խթան հանդիսանալ կատարողական և  կոմպոզիտորական արվեստի համար»,– ասաց նա ու հավելեց, որ մրցանակակիրները կստանան Նուռի պատրաստած արձանիկները։ 

Մրցանակաբաշխության երաժշտական պրոդյուսերը Հայկոն է։ Վերջինս նշեց, որ  ընտրվել են բոլոր բնագավառների լավագույն ներկայացուցիչները. «Լինելով փոփ ժանրի և կինոարտադրության ոլորտի մարդ` շատ ուրախ եմ, որ մրցանակաբաշխությունում ավելի շատ տեղ է տրված դասական երաժշտությանը։ Ազգային, փոփ ժանրերից ընտրված են լավագույնները, ովքեր արժանի են գնահատվելու»։

Պրոդյուսեր Տիգրան Վիրաբյանն էլ նկատեց, որ այժմ բազմաթիվ մրցանակաբաշխություններ են իրականացվում ՀՀ–ից դուրս և վստահություն հայտնեց, որ  իրենք կկարողանան ազգային երաժշտական մրցանակաբաշխությունը դարձնել Հայաստանում ամենասպասված  իրադարձությունը։

Այժմյան մրցանակաբաշխությունների տեղատարափի մեջ մեծ հարց է առաջանում` ովքեր և ինչ սկզբունքով են ընտրելու լավագույններին։ Նա հավաստիացրեց, որ լավագույնների ընտրությունը կատարվելու է արդար։ «Ժյուրիի կազմը փակ է, սակայն դրանում ընդգրկված են ոլորտի լավագույն մասնագետները։ 7 հոգանոց  կազմում ներկայացված են, օրինակ,  փոփ ժանրում` Արթուր Գրիգորյանը, դասականում` էդուարդ Թոփչյանը։ Բարձրակարգ մասնագետների 7 հոգանոց խումբը մեզ վստահություն է ներշնչում, որ մրցանակաբաշխությունը լինելու է թափանցիկ և գնահատվելու են միմիայն լավագույնները»,– նշեց նա։

Մրցանակաբաշխության բեմադրող ռեժիսորն Արթուր Մանուկյանն է։  Նա  նշեց, որ ուզում են երաժշտական շքեղ շոու ներկայացնել. «Լինելու են համերգային անկանխատեսելի համարներ, գեղեցիկ շոու ծրագիր։ Ամեն ինչ արվելու է, որպեսզի այս մրցանակաբաշխությունը լինի տարվա ամենակարևոր իրադարձություններից մեկը»։

Տիգրան Վիրաբյանն էլ կարևորեց, որ մրցանակաբաշխությունը չկենտրոնանա միայն Երևանում գործող երաժիշտների վրա և հայտնեց, որ աշխատում են  մարզկենտրոնների հետ, որպեսզի մասնակցության հնարավորություն ունենան երաժիշտներ Հայաստանի բոլոր մարզերից, Արցախից, Սփյուռքից։ Նա նկատեց, որ մարզերում շատ կարևոր մշակութային իրադարձություններ են լինում, որոնք նույնպես արժանի են գնահատվելու։ Օրինակ Գյումրուց արդեն ներկայացված է 5 աշխատանք։

«Ցանկացած ժանրում հայտերը կարող են  ներկայացնել նրանք, ովքեր կարծում են, որ իրենք  արժանի են մասնակցելու մրցանակաբաշխությանը»,– ասաց պրն Ամիրյանը։ Հարցին` կազմակերպիչները չե՞ն դիտարկում թեկածուների, մրցանակաբաշխությանը պետք է մասնակցեն միայն նրանք, ովքեր հա՞յտ կլրացնեն, պրոդյուսերը պատասխանեց. «Մենք գիտենք այն մարդկանց, որոնց աշխատանքն ակներև է։ Բնականաբար, լինում են բանակցություններ առաջարկներ մասնակցության համար, սակայն պաշտոնական մասը ենթադրում է հայտի լրացում։ Կան մարդիկ, որոնք Հայաստանում արդեն մրցակցությունից դուրս են։ Նրանց կտրվի հատուկ մրցանակ»։

Արմեն Ամիրյանը նշեց, որ իրենք գնահատելու են պրոֆեսիոնալ խմբերին, որոնց տարվա ընթացքում ընդգրկելու են մշակութային տարբեր նախագծերում, որպեսզի տեսադաշտից չկորչեն։  Tert.am Life–ի դիտարկմանը, որ հեռուստատեսությունները պրոպագանդայի կարևորագույն լծակ են, սակայն մեծապես հարթակ են տալիս փոփ երաժշտությանը, ի՞նչ է անում Մշակույթի նախարարությունը, որպեսզի դասական ու ժողովրդական երաժշտությունը, որն ուզում են արժևորվել մրցանակների միջոցո,  տարածում գտնի նաև հեռուստատեսությամբ, Ամիրյանը պատասխանեց. «Ինչ–որ բանի սկիզբը «Ծիծեռնակ» մրցանակաբաշխությունն է։ Նման արժևորումներով պետք է հանրությանը հասանելի դարձնենք, հեռուստաընկերություններին կռահել տանք, որ  այս երաժշտությունը ևս կարող է ունենալ լսարան։ Դասական երաժշտությունն ամբողջ աշխարհում լսարան ունի, ինչու Հայաստանում չի կարող լսարան ունենալ»։

Լուսանկարները` Գևորգ Խուրշուդյանի