«Երբ գալիս եմ աշխատանքի, բոլոր խնդիրները անհետանում են». հաղորդավարուհի Արփի Մայիլյանը՝ իր նոր ֆոտոշարքի ու հեռուստատեսային աշխատանքի մասին

Հաղորդավարուհի Արփի Մայիլյանն ամեն առավոտ հեռուստադիտողին բարի լույս է մաղթում «Արմնյուզ» հեռուստաընկերության եթերից: Ասում է՝ ուղիղ եթերում աշխատելն առանձնակի հաճույք է: Արփիի խոսքով, հեռուստատեսային աշխարհն իրեն մշտապես է գրավել: Tert.am Life-ի հետ զրույցում հաղորդավարուհին պատմել է իր հիմնական մասնագիտության, հեռուստատեսային աշխատանքի մասին և տրամադրել իր նոր ֆոտոշարքը, որն իրականցրել է Գյումրիում:

Հաղորդավարուհին նշեց, որ առաջին անգամ է եղել Գյումրիում և բավականին տպավորված է Հայաստանի երկրորդ մայրաքաղաքի գեղեցկությամբ: Ֆոտոշարքն իրականացնելու գաղափարն, Արփիի խոսքով, հենց տեղում է ծնվել: Լուսանկարներն արվել են Սև բերդ ամրոցի ներսում և շրջակայքում:

«Սա իմ առաջին այցն էր Գյումրի, հրավիված էի Հրաչ Քեշիշյանի <<Ոչինիչ չի մնա>> ներկայացման առաջնախաղին: Քանի որ քաղաքը բացահայտելու համար մի քանի ժամ ունեի, փորձեցի այն համատեղել նաև գեղեցիկ լուսանկաներ ստեղծելով։ Լուսանկարների հեղինակը իմ լավ ընկեր ու գործընկեր պրոդյուսեր, ռեժիսոր Գրիգոր Հովհաննիսյանն է։ Գյումրին Ֆանտաստիկ քաղաք է։ Երևի թե բառերը չեն կարող արտահայտել այն ամբողջ հմայքը, շքեղությունը, գրավչությունը, ջերմությունը և հյուրընկալությունը, որ ունի Գյումրին։ Թեպետ քաղաքն անցել է մեծ դժվարությունների միջով, բայց երանելի մի գիծ հաստատ պահպանվել է՝ պատմություն ունեցող քաղաքի շունչը։ Ամեն քայլին կարող ես մի կառույց, մի շենք, մի աթոռ նկատել, որը հնուց է, բայց նորի կողքին էլ ավելի շքեղ ու յուրահատուկ է նայվում։ Երևի թե քաղաքի այս ներքին լիության շնորհիվ է, որ գյումրեցիներն  էլ են նույնքան լի մարդիկ: Մարդիկ այստեղ բարի են, հյուրընկալ , խաղաղ ու ժպիտով լի։ Իսկական հային բնորոշ գծերը հենց այստեղ են պահպանվել»,-ասաց նա:

Արփին առաջին մասնագիտությամբ թարգմանչուհի է: Ավարտել է Վալերի Բրյուսովի անվան լեզվահասարակագիտական համալսարանը, այժմ էլ կրթությունը շարունակում է նույն համալսարանի մագիստրոսական բաժնում. «Շատ սիրելով գրականություն և լեզուներ՝այս անգամ ընտրել եմ ռուսաց լեզու և գրականություն ֆակուլտետը։ Չի բացառվում հետագա կրթությունս արտերկրում շարունակելը, բայց վստահ եմ, որ այդ դեպքում էլ ընտրելու եմ ուղի, որը կապ կունենա թե՛ հաղորդավարական կարիերայիս, թե՛ թարգմանչի գործունեության հետ»:

 Հաղորդավարուհին նկատեց, որ հեռուստատեսային աշխատանքն իր պարագայում պատահական որոշում չի եղել. «Արդեն 3 տարի է, ինչ աշխատում եմ հեռուստատեսությունում։ Այս երեք տարիների ընթացքում հասցրել եմ ոչ միայն սիրել և կապվել ուղիղ եթերի աշխատանքի հետ, այլ նաև զգալ դրա անհրաժեշությունը ամեն պահի։ Հեռուստատեսային աշխարհը նախընտրելս շատ հանկարծակի կամ պատահական որոշում չէր։ Այն միշտ էլ ինձ գրավում էր և վստահ էի, որ իրական հեքիաթների աշխահը հենց սա է, այստեղ գալով չես կարող երազել կամ սիրել մեկ այլ բան, եթե այն իրոք քոնն է»,-ասաց նա:

«Արմնյուզի» Առաջին ծրագիրը հեռարձակվում է ուղիղ եթերում, ինչն Արփիի դիտարկմամբ, ենթադրում է առավել պատասխանատու և պատրաստված մոտեցում աշխատանքին. «Ուղիղ եթերում աշխատելը մի առանձին հաճույք է, որովհետև միշտ միտքդ և խոսքդ արթուն է։ Գիտակցելով, որ ուղիղ եթերում թույլ տված ցանկացած սխալ անուղղելի է, էլ ավելի պատրաստված և պատասխանատու ես մոտենում աշխատանքիդ»:

Վաղ առավոտյան հեռուստադիոտղին դրական լիցքեր հաղորդելը, Արփիի կարծիքով, կվերածվեր բարդ աշխատանքի, եթե բնույթով ուրախ մարդ չլիներ. «Ինձ համար ցանկացած երևույթ ունի իր թե՛ դրական , թե՛ բացասական կողմերը, բայց ես նախընտրում եմ դրական կողմից այն տեսնել։ Իհարկե, լինում են օրեր, երբ վատ տրամադրությամբ,գուցե արթնանամ, բայց երբ գալիս եմ աշխատանքի, բոլոր խնդիրները անհետանում են, որովհետև հազարավոր մարդկանց պետք է բարի լույս մաղթեմ և ժպիտով վարակեմ։ Այս գիտակցումն արդեն ապրելակերպ է դարձել»,-ասաց նա:

Անդրադառնալով հեռուստատեսային գործընկերների հետ համատեղ աշխատանքին, Ափին նկատեց, որ Սուրեն Առուստամյանի հետ ներկայանում է ինչպես <<Առաջին ծրագրի>>, այնպես էլ  <<Հիմա ուր>> հաղորդման շրջանակում. «Սուրենի հետ մեր աշխատանքը հենց առաջին օրվանից էլ բավականին հեշտ, հաճելի և խաղաղ է ընթացել։ Մինչ օրս մենք երբեք չենք պայմանավորվում, թե մեզանից ով, երբ, և ինչ է ասելու ուղիղ եթերում, բայց հենց տեսախցիկները միանում են, մենք ճիշտ հաջորդականությամբ շարունակում ենք մեկմեկու խոսքը։ Չենք վախենում մեկս մյուսի սխալի մասին բարձրաձայնել և կամ թե գովել իրար ։): Իհարկե այս երեք տարիների ընթացքում աշխատել եմ նաև մեր հեռուստատեսության հաղորդավարներից Համլետ Առաքելյանի և Ներսես Ավետիսյանի հետ։ Հիմա էլ «Առաջին Ծրագրում» աշխատում եմ Թելման Խաչատրյանի հետ: Յուրաքանչյուր համագործակցություն էլ հետաքրքիր է, նորովի ու նաև ստեղծագործական մոտեցումները հղկելու առումով` գրավիչ»,-եզրափակեց նա: