«Այդ տեսարանից հետո մի քանի օր չէի կարողանում խոսել խաղընկերոջս հետ»․ «Պատվից առավել»-ից Մերի Մովսեսյանը՝ իր կերպարի բարդության և ուսանողական կյանքի մասին

20-ամյա Մերի Մովսեսյանը հեռուստատեսային իր ճանապարհը սկսել է 15 տարեկանից՝ նկարահանվելով նախ «Թևանիկ» ֆիլմում, ապա «Շանթ» հեռուստաընկերության «Սահմանին» նախագծում։ Մերին ներկայումս նկարահանվում է Ելենա Արշակյանի «Պատվից առավել» հեռուտասերիալում և սովորում է Թատերական ինստիտուտում, երկրորդ կուրս է։   

Tert.am Life-ը դերասանուհու հետ զրուցել է «Պատվից առավել»-ում բարդ կերպար մարմնավորելու, հոգեբանական խնդիրներ հաղթահարելու, առօրյայի և հետաքրքրությունների մասին։

Մերին նշեց, որ դերասանուհու մասնագիտության մասին մանկուց է երազել՝ ցանկությունների մի մասը հասցրել է իրականություն դարձնել, վստահ է՝ չնայած դժվարություններին, դեռ ավելին է անելու:

«Նպատակասլաց մարդ եմ և հասնելու եմ մեծ բարձունքների։ Իհարկե, ինձ մոտ եղել է մի շրջան, երբ ինչ-որ չափով հոգնել էի։ Չէի կարողանում հասկանալ՝ արժե՞ այս գծով գնալ, թե՞ ոչ։ Փորձում էի ինքս ինձ հետ անկեղծ լինել և հասկանալ՝ իմ ինչի՞ն է պետք այս մասնագիտությունը։ Իսկապես, շատ բարդ է, հատկապես, երբ նկարահանումները համատեղում ես դասերի հետ, սկսվում է անքնություն, սթրեսային իրավիճակ։ Չէի հիասթափվել, ուղղակի տարակուսում էի, սակայն իմ մեջ ուժ գտա, հասկացա, որ սիրում եմ իմ մասնագիտությունը, և սա միակ բանն է, ինչով ուզում եմ զբաղվել ամբողջ կյանքում»,- ասաց նա։

«Պատվից առավել» հեռուստասերիալում Մերին մարմնավորում է գլխավոր հերոսի՝ Գևորգ Գրիգորյանի կերպարի՝ Մուրադի քրոջը, որը, չնայած երիտասարդ տարիքին, ընտանեկան բռության զոհ է։ Դերասանուհու խոսքով՝ կերպարը գտնելու ճանապարհին ունեցել է որոշ խնդիրներ, անգամ, հոգեբանական տեսանկյունից։

«Լուսինի կերպարը շատ բարդ է․ նրան 18 տարեկանում ամուսնացրել են իր կամքին հակառակ, երեխա ունի, ամուսնական կյանքի ընթացքում ամուսնու կողմից ծեծի է ենթարկվել։ Ի սկզբանե ինձ համար բավականին բարդ էր, քանի որ ես չէի հասկանում այդ կերպարին, իմ շրջապատում չէին եղել մարդիկ, որոնք բախվել էին նման խնդրի։ Մարմնավորեցի կերպարն ու երբ հեռուստասերիալն արդեն եթերում էր, ինձ սկսեցին շատ-շատ աղջիկներ գրել, որոնք արժանացել են նման ճակատագրի: Հասկացա, որ նրանք արդեն իսկ որոշ չափով իրենց հանգիստ էին զգում, երբ խոսում, կիսվում էին այդ մասին»,- ասաց դերասանուհին ու հավելեց, որ կերպարը կառուցելիս քննարկում են ունենում ռեժիսորի հետ, հասկանում են, թե ինչ տեսակ է կերպարս, ով է, ինչպիսին է: «Հետագա աշխատանքը, թե ինչպես եմ մարմնավորում և ստանում կերպարս, ամեն դերասանի համար մաստագիտական գաղտնիք է»,- նկատեց նա:

Անդրադառնալով հոգեբանական խնդրին՝ Մերին ասաց, որ տեսարաններից մեկն իր վրա այնքան է ազդել, որ երեք օրից ավելի չի կարողացել շփվել խաղընկերոջ հետ։

«Կար մի տեսարան, երբ ամուսինը բռնի ուժով փորձում էր համբուրել Լուսինին։ Ամուսնուս՝ Վարդանի դերակատար Համլետ Ղազարյանի հետ կարդից դուրս շատ մտերիմ ենք, բայց այդ տեսարանը նկարահանելուց հետո ես մի քանի օր չէի կարողանում խոսել իր հետ: Սրտիս շատ մոտ էի ընդունել, շատ էի ազդվել։ Այդ ժամանակ արդեն վստահ կարող եմ ասել, ինչ-որ չափով սկսեցի հասկանալ և գիտակցել, թե դա որքան դժվար ու բարդ խնդիր է։ Անկեղծ եմ ասում, ես նրա հետ երեք օր ընդհանրապես չէի խոսում»,- ասաց Մերին։  

Դերասանուհու խոսքով՝ իրեն ընդառաջում է և՛ նկարահանող թիմը, և՛ դասախոսական կազմը, ինչն իրեն հնարավորություն է տալիս նաև վայելել ուսանողական կյանքը։ Մերին նշեց նաև, որ ավագ գործընկերներն իրեն օգնում են խորհուրդներով։

«Երբ ես չեմ կարողանում հասկանալ, թե ինչպես ճիշտ ներկայացնել որևէ տեսարան,  նրանք ինձ ուղղություն են ցույց տալիս, ինչի համար շատ շնորհակալ եմ իրենցից։ Չի եղել դեպք, որ, օրինակ, ասեն ես երիտասարդ եմ և դրա պատճառով իմ խաղը կարող է ավելի վատը լինել»,- ասաց դերասանուհին։

Բացի որպես դերասանուհի հանդես գալը Մերին նաև ստեղծագործում է։ «Իմ նախասիրություններից է բանաստեղծություններ գրելը։ Հաճախ չեմ գրում, որովհետև պետք է մուսաս գա։ Երբ որևէ պատմություն եմ լսում կամ ինչ-որ հետաքրքիր բան է տեղի ունենում, թղթին եմ հանձնում։ Դա ինձ փոխանցվել է ժառանգաբար՝ իմ պապիկից: Թեև, ի տարբերություն նրա, ես ռուսերենով եմ ստեղծագործում։ Այդպես ավելի լավ է ստացվում մտքերս շարադրել»,- ասաց Մերին։