Ռուբեն Բաբայանը վստահ է՝ աղմուկը տխմարություն է, համերգի կազմակերպիչը վստահեցնում է՝ Vader ռոք խումբը սատանիստ չէ․ Տիկնիկային թատրոնում չեղարկված համերգը տեղափոխվել է ակումբ

Համացանցում բուռն քննարկվում է Տիկնիկային թատրոնում լեհական Vader ռոք խմբի համերգի չեղարկումը։ Մինչև համերգի չեղարկումը սոցցանցերում տեղեկություն էր տարածվել, որ ռոք խմբի մենակատար Պյոտր Պավել Վիվչարեկը սատանիստ է, ինչը հանրության մի զանգվածի մոտ բողոքի ալիք էր բարձրացրել։ Թատրոնի ղեկավարությունը, տեղի տալով հանրային ճնշմանը և համերգի կազմակերպիչ Zhesht Events-ի հետ չունենալով գրավոր պայմանագիր, հրաժարվել էր տրամադրել դահլիճը։ 

Այս թեմայով իրենց կարծիքն են հայտնել նաև Սերժ Թանկյանն ու Տիգրան Համասյանը: Սերժ Թանկյանն իր գրառման մեջ կարևորել է ապատեղեկատվությանը չխաբվելու հանգամանքը՝ հատկապես, երբ խոսքն արվեստի մասին է։ SOAD-ի մենակատարը հիշեցրել է, որ Հյուսիսային Կարոլինայի Շարլոթ քաղաքի ավետարանական համայնքը ևս կեղծ տեղեկատվություն է տարածել իր անվան շուրջ՝ մինչև իսկ իրեն ու SOAD-ին սատանիստ անվանելով։ Տիգրան Համասյանն էլ իր հերթին նշել է, որ երաժշտության մեջ գրաքննություն չպետք է լինի։

Աղմկահարույց թեմայի մասին Tert.am Life-ը զրուցել է համերգի կազմակերպիչ Zhesht Events-ի հիմնադիր Արսեն Հակոբյանի և Տիկնիկային թատրոնի տնօրեն Ռուբեն Բաբայանի հետ։

Խումբը երբևէ սատանիզմի հետ կապված որևէ քարոզչություն չի արել․ Արսեն Հակոբյան

Համերգը կազմակերպած կողմը վստահեցնում է՝ խմբի անդամներից որևէ մեկը սատանիստական հայացքներ չունի։ Ըստ Zhesht Events-ի հիմնադիր Արսեն Հակոբյանի՝ 2016 թվականի նրանց հարցազրույցներից մեկը հանրությանը մատուցել են աղավաղված, իսկ մենակատարի խոսքը՝ կոնտեքստից կտրված, ինչն էլ նման քննարկումների առիթ է դարձել:

«Այս օրերի ընթացքում այնքան ապատեղեկատվություն է տարածվել, այնքան թյուրըմբռնում կա, որ մարդիկ, առանց ինֆորմացիային տիրապետելու, վերցնելով կոնտեքստից կտրված մի քանի տող, որպես ճշմարտություն են ներկայացնում։ Vader-ի հարցազրույցից վերցրել են մի նախադասություն, որն ամբողջությամբ կտրված է հիմնական ասելիքից։ Խմբի մենակատարն ասել է, որ սատանիզմն ընկալում է որպես ըմբոստության սիմվոլիզմ։ Իրենք ըմբոստանում են վատ երևույթների դեմ՝ այդ թվում պատերազմի, դաժանության, քաղաքականության, կոռուպցիայի, չարության, չեն հարգում վատ երևույթները։ Պետք է քմծիծաղով ընկալել, թե իրենք մասնակցում են ծեսերի, զոհաբերություններ ու սատանիստական այլ բաներ են անում։ Դա իրենց համար զուտ իմիջ է և կյանքի վատ երևույթների դեմ ըմբոստության սիմվոլիզմ։ Հարցազրույցի այս հատվածից վերցրել են միայն այն մասը, որտեղ նա ասում է, եթե դա կարելի է համարել սատանիզմ, ապա ես սատանիստ եմ և թյուրիմացության հիմք տվել։ Առանց ամբողջական կոնտեքստին ծանոթանալու այդ մի նախադասությամբ տարածել են ինֆորմացիան։ Խումբը  երբևէ սատանիզմի հետ կապված որևէ քարոզչություն չի արել, իրենց ելույթների ժամանակ ևս այս թեմայով որևէ բան չեն ասել, առավել ևս ծեսերի չեն մասնակցել»,- ասաց Արսենը։

Վերջինս նշեց, որ խմբի մասնակիցները, անկախ ամեն ինչից, ժամանելու են Հայաստան: Նրանց համերգը տեղի կունենա Երևանի ժամանցի վայերերից մեկում, քանի որ առաջին դեպքը չէ, որ նրանց քարկոծում են․ «Իրենք տեղյակ են Հայաստանում բարձրացած աղմուկի մասին: Իրենց համար նորություն չէ, որ առանց երկար-բարակ մտածելու մարդիկ նման բաներ են խոսում։ Մյուս կողմից նրանք շատ ոգևորված են, որ իրենց աջակցում են, այդ թվում՝ Սերժ Թանկյանն ու Տիգրան Համասյանն են անդրադարձել այս թեմային: Վստահ ենք, որ դեռ այս թեման կտարածվի։ Խումբն արդեն 30 տարվա պատմություն ունի և առաջին անգամ չէ, որ նրանց քարկոծում են»։

«Ես ինձ շատ մեղավոր եմ զգում, բայց հանրային ճնշումը մեծ էր»․ Ռուբեն Բաբայան

Տիկնիկային թատրոնի տնօրեն Ռուբեն Բաբայանն ընդգծեց․ «Ես ինձ շատ մեղավոր եմ զգում, անկեղծ, այնքան մեղավոր․․․ Եթե ես լինեի անհատ, իսկ Տիկնիկային թատրոնն իմ սեփականությունը, երբեք չէի մերժի այս համերգի անցկացումը։ Սակայն սա Տիկնիկային թատրոնն է, պետական թատրոն է և չէի կարող թույլ տալ որևէ բան ազդեր կառույցի հեղինակության վրա։ Անգամ բազմաթիվ սպառնալիքներ են եղել, թե կվնասեն թատրոնը: Ելնելով տրամադրվածությունից՝ կանեին, ես ինչպե՞ս թույլ տայի դա»։

Ռուբեն Բաբայանը հիշեցրեց, որ տարիներ շարունակ հենց Տիկնիկային թատրոնն է իր դռները բացել ռոքի սիրահարների համար, իրենց բեմին բազմիցս տեղի են ունեցել ռոքի փառատաններ ու համերգներ ինչպես արտասահմանյան, այնպես էլ հայկական խմբերի մասնակցությամբ։

Ըստ Տիկնիկային թատրոնի տնօրենի՝ Հայաստանում արվեստի ու մշակույթի հետ կապված տեղեկատվության իմացության լուրջ պակաս կա, որը հնարավոր է լրացնել միայն լուսավորչական աշխատանքի շնորհիվ։

Ռուբեն Բաբայանը նշեց, որ հնարավոր է այս աղմուկը չլիներ, եթե երկու ամիս առաջ, երբ հայտնի դարձավ խմբի գալու մասին, ինֆորմացիոն արշավ սկսեին և  տեղեկացնեին խմբի մասին։

«Եթե լիներ հավաստի ինֆորմացիոն հոսք խմբի, նրանց պատմության մասին, այս պարզունակ արձագանքը չէր լինի։ Սա ազդակ է, որ հետագայում մենք պատրաստված մոտենանք հարցին, որպեսզի նման թյուրըմբռնումներ չլինեն հասարակության կողմից։ Մենք ունենք հանրության կոնսերվատիվ մի մաս, որը բավականին ակտիվ է, միանգամից արձագանքում է, խոսում ազգային արժեքներից։ Ի հեճուկս կոնսերվատիվ այս ակտիվությանը՝ ունենք ժամանակակից ինտելեկտուալ հասարակության մի հատված, որը պասիվ է։ Նրանք զբաղված են, չեն օգտագործում իրենց ինտելեկտուալ հզոր հնարավորությունները։ Նրանք պետք է իրենք լուսավոր հայացքներով տեղեկացնեն մարդկանց, խոսեն այն մասին, որ այս մթությունից այն կողմ կա ժամանակակից արվեստ։ Այնպիսի տպավորություն ստեղծվեց, որ Հայաստանում բոլորը դեմ էին այդ համերգին»,- ասաց Ռուբեն Բաբայանը։

Նա նշեց, որ տեղյակ է նաև Սերժ Թանկյանի և Տիգրան Համասյանի գրառումների մասին, որոնք խոսել են ի պաշտպանություն այս խմբի․ «Եթե անկեղծ ասեմ, անկախ ամեն ինչից հանրության հետ պետք է լուսավորչական որոշակի աշխատանք տանել, որովհետև նրանք, ովքեր մտածում են, թե Vader խումբը կարող է սատանիզմ քարոզել, այդ զանգվածի համար Սերժ Թանկյանն էլ է սատանիստ, ես էլ եմ սատանիստ։ Այս քանի օրմ ինձ շատ անգամ ուղարկեցին դժոխք։ Իրականում զարմանալի է, որովհետև երեկ ես նյութ տեսա, որտեղ ասվում էր, թե  ծնողները պետք է զգույշ լինեն երեխաներին Տիկնիկային թատրոն բերելիս, որովհետև, հնարավոր է, մենք կոդավորված այլասերվածություն քարոզենք։ Այս մակարդակի հետ հնարավո՞ր է լուրջ խոսել, ոչ։ Հուսանք, որ մի որոշ ժամանակ անց մենք կսկսենք ծիծաղել մեր այս վախերի վրա, այնպես, ինչպես հիմա ծիծաղելի է, որ հազարավոր տարիներ առաջ մարդիկ ամպրոպը համարում էին Աստծո պատիժ։ Սրանք պարզունակ օրինակներ են, բայց լավագույնս արտացոլում են այն, ինչ այսօր տեղի է ունենում։ Սա կոնսերվատիզմ չէ, սա տխմարություն է, խավարամտություն և, ինչպես խավարասերների դեմ պայքարում, այնպես էլ այս դեպքում, պետք է պայքարել միայն լույսով»։