«Սյուրպրիզ» սիթքոմի 4–րդ եթերաշրջանը, BACKSTAGE լուսանկարներն ու հարցազրույցները գլխավոր հերոսների հետ

Եթերաշրջանի «սյուրպրիզներով» լի սիթքոմը՝ «Սյուրպրիզ»–ը 4–րդ եթերաշրջանով վերադառնում է Արմենիա հեռուստաընկերության եթեր։

Սիթքոմի անակնկալները շարունակվում են, իսկ սցենարիստները վստահեցնում՝ այս եթերաշրջանը տարբերվելու է նախորդներից։ Tert.am Life-ը ներկա է եղել սիթքոմի նկարահանումներին և ներկայացնում է մանրամասներն ու BACKSTAGE լուսանկարները։ 

Գրիգոր Դանիելյանը մեզ հետ զրույցում ներկայացրեց այս եթերաշրջանի մոտիվները՝ ցույց տալով, որ հանդերձարանում փակցված է սիթքոմի շապիկը, որտեղ մնացյալ բոլոր հերոսները նշանառության տակ են։
«Կարող եմ ասել, որ 4–րդ եթերաշրջանն ամենասպասվածն է, քանի որ նախորդ եթերաշրջանն ավարտվել է Մաշայի և Պայքարի ամուսնությամբ, իսկ Գրիշն ու Անժելը ևս միասին են և հեռուստադիտողի մոտ մի շարք հարցեր առաջացան՝ ինչպես է շարունակվելու կամ ավարտվելու այս պատմությունը։ Այս եթերաշրջանում հեռուստադիտողը կտեսնի՝ ինչպես են երկու ընտանիքներն ապրելու միասին՝ կիսելով կենցաղը, երբ կա չբացահայտված գլխավոր գաղտնիքը։ Այս եթերաշրջանում մենք չունենք նոր հերոսներ, քանի որ պատմությունը ծավալվելու է արդեն իսկ ծանոթ դեմքերի շուրջ, բայց ունենք էպիզոդիկ դերեր և այսօր օրինակ մեզ հետ է Արամ MP3–ն, որը ևս էպիզոդիկ դերում է խաղում՝ մարմնավորելով հենց իրեն»,– ասաց Գրիգոր Դանիելյանը։ 

Նախագծի «ակունքներում» կանգնած թատրոնի և կինոյի դերասանուհի Լուիզա Ներսիսյանը նշում է՝ այս եթերաշրջանում իր հերոսուհին բարդ իրավիճակում է՝ չգիտակցելով, թե ուր հասցրեց առաջին րոպեներից ասված սուտը։ 

«Այս եթերաշրջանում մենք ևս տեսնելու ենք անհավանական պատմություն, երբ մեկ տան մեջ ապրելու են երկու «ընտանիք» և իմ հերոսուհու աչքի առաջ իր նախկին ամուսինը նոր ընտանիք է ձևավորում։ Պարբերաբար հերոսուհիս հայտնվում է ճգնաժամային իրավիճակներում, երբ ստիպված այդ տանը հանդուրժում է Մաշային ու պարբերաբար լինում են բախումներ։ Հնարավորինս տարօրինակ իրավիճակ է, երբ ստի հեղինակը հենց հերոսուհիս է, բայց ամեն բան այնքան է զարգացել, որ ինքը ևս խճճվել է՝ չհասկանալով սուտն ու ճիշտը»,– ասաց Լուիզա Ներսիսյանը։

Թատրոնի և կինոյի դերասանուհի Մարիամ Ալեքսանյանն այս շրջանում զբաղվածություն ունի Աշտարակի դրամատիկական թատրոնում և զուգահեռաբար նկարահանվում է «Սյուրպրիզ» սիթքոմում և իր հարցազրույցներում պարբերաբար նշում, որ իրեն պարբերաբար անհրաժեշտ է եթերային դադար։

«Այս եթերաշրջանում սցենարիստները մի փոքր դաժան են գտնվել հերոսուհուս նկատմամբ՝ սցենարը կարդալով երբեմն չեմ հասկանում և չեմ կարողանում արդարեցնել իր արարքները։ Կարծում եմ, որ նախորդ եթերաշրջաններից հետո կերպարս ինչ–որ չափով սիրվել է, բայց այժմ պատմությունն ու արարքներն այլ կերպ են ընթանալու։ Ես կարծում եմ, որ հանուն սիրո կարելի է անել նաև խենթ քայլեր և չեմ կարող կերպարին բացասական որակել։ Իմ անունից, եթե խոսեմ կարող եմ ասել՝ ես նույնպես հանուն սիրո պատրաստ եմ կիրառել բոլոր «զենքերը», սիրո հարցում չկան «չի կարելիներ» և այդ զգացողությունները դու ապրում ես՝ երջանկանալով արդյունքներից։ Որպես Մարիամ Ալեքսանյան կարող եմ ասել՝ սերն ինձ համար առաջնային տեղում է և ինքս հանուն սիրո պատրաստ եմ մեծագույն քայլերի, որոնց գուցե տղամարդիկ պատրաստ չլինեն»,– ասաց Մարիամ Ալեքսանյանը։ 

Գլխավոր հերոսին՝ Պայքարին մարմնավորում է դերասան և հաղորդավար Արման Խաչատրյանը, որը մեզ հետ զրույցում շեշտեց՝ ողջ պատմության ամենաադեկվատ կերպարը հենց Պայքարն է, որը վերջապես հասկացել է՝ ինչ է ուզում և ինչպես պետք է շաունակվի իր պատմությունը։ 

«Մենք ունեցել ենք հրաշալի մեկնարկ և 4–րդ եթերաշրջանում էլ ավելի բարելավվում ենք, թե՛ սցենարը, թե՛ դերասանական խաղը՝ ակնկալելով արդյունքներ ու դրական ընթացք։ Կարող եմ ասել, որ այս եթերաշրջանում շատ հետաքրքիր շեշտ է դրված հումորի վրա,որը հիմնված է սատիրայի։ Հերոսս հնարավորինս չեզոք է և իրականությանը մոտ, բայց, այնուամենայնիվ գնում է ստի հետևից և այժմ ապրում նախկին և ներկա կնոջ հետ մի տանը»,– եզրափակեց Արման Խաչատրյանը։